Şêniyên Helebê desteka xwe ji Berxwedana Rûmetê re didomînin

Îro bi dehan şêniyên Xeta Şehîd Rûbar Qamişlo û endamên Meclisa taxa Eşrefiyê li Qada Şehîdan a taxa Şêxmeqsûd kom bûn ku konê piştgiriyê lê hatiye vedan.

Kon bi wêneyên şehîdan, wêneyên rêber Abdullah Ocalan û pankartên "Parastina xak û rûmeta xwe bikin","Êrîşa Tirkiyê ya ser li Bakur û Rojhilatê Sûriyê şermezar dikin" hatin hildan.

Çalakiyê bi rêzgirtinê dest pê kir, paşê endamê rêveberiya Xeta Şehîd Rûbar Qamişlo Ehmed Xelîl axivî û behsa dîroka dewleta Tirk û qirkirin û komkujiyên ku Tirkiyê li dijî gelê Kurd pêk anîne, kir û wiha got: "Projeya dewleta Tirk qirkirin û pêkanîna komkujiyên li ser gelê Kurd e, derbasbûna Tirkiyê li xaka Sûriyê armanca tunekirina nasnameya gelê Kurd e û armanca din vejandina Osmaniyan e."

Her wiha endama Kongreya Star Mewlîde Silêman axivî û got QSD`ê hemû herêmên çeteyên DAIŞ`ê rizgar kirin û ewlehî û istîqrar li Bakur û Rojhilatê Sûriyê vegerand, lê dewleta Tirk dixwaze DAIŞ`ê vejîne û projeya xwe ya dagirkeriyê li Sûriyê dewam bike.

Her wiha endamê Komîna Şehîd Gelhat a taxa Şêxmeqsûd Kamîran Bîlal got dewleta Tirk û çeteyên wê komkujî li ser gelên herêmê pêk anî û nikare îradeya gelan bişikîne û piştrast kir ku ew ê heta dawiyê piştgiriya Berxwedana Serdemê bikin.

Çalakî dewam dike.

(jo)

ANHA