Bi hezaran cenazeyê şehîd Çiyager spartin axê

Bi hezaran şêniyên herêma Dêrikê û Girkê Leêg cenazeyê şervanê YPG‘ê Yezen Mihemed Şerîf (Çiyager) ê ku li gundewarê Dêrazorê şehîd bibû li Goristana Şehîd Xebat Dêrik spartin axê.

NÛÇE

14 nîsan, 2019 15:58

QAMIŞLO

Şêniyên herêma Dêrik û gundewarên wê cenazeyê şervanê YPG‘ê Çiyager Dêrik ê ku 13’ê Nîsanê li Dêrazorê dema bi erka xwe radibû şehîd bibû ji nexweşxaneya Şehîd Hogir wergirtin, piştî kerwanê cenaze li kolanên bajarê Dêrikê gerandin û li Goristana Şehîd Xebat Dêrikê spartin axê.

Li goristanê deqeyeke rêz hate girtin û ji aliyê şervanên YPG‘ê ve merasîma leşkerî pêk hat. Paşê bi navê hêzên leşkerî fermandar Baz Dêrik sersaxî ji malbata şehîd re xwest û got: " Şehîd Çiyager di tevlîbûna xwe de di şerên li dijî terorê xwedî rihekî wêrek, fedakar û kedkar dihat nasîn. Ji bo pêkanîna aştiyê û jiyaneke azad tê koşiya û di oxira wê de jiyana xwe berdêl da."

Rêveberê Meclisa Malbatên Şehîdan a Girkê Legê Mihemed Cemîl jî axivî, hemû cangoriyên azadiyê bi bîr anî û got bi saya xwîna şehîdan serkeftinên mezin hatin bi destxistin.

Nasnameya şehîd ji aliyê Meclisa Malbatên Şehîdan a Girkê Legê ve hate xwendin û radestî malbata wî hate kirin.

Girseya gel cenazeyê şehîd di nava dirûşme û tilîliyên dayikan spartin axê.

ANHA