Nivîskarên Efrînê Berxwedana Serdemê kirin pirtûk

ŞEHBA

Yekîtiya Rewşenbîran a Kantona Efrînê pirtûkên cihereng girêdayî Berxwedana Serdemê derxistin.

Yekîtiya Rewşenbîran a Efrînê îro şahiya imzekirina pirtûkan bi tevlibûna nivîskaran û hejmarek ji rewşenbîran, tevî nûnerên Rêveberiya Xweser û mamosteyan organize kirin.

Naverokên pirtûkan berxwedana Efrînê û êrîşên dagirkeriya Tirkiyê bi helbest, roman û serpêhatiyan vegotin.

Şahî bi deqeyek rêzgirtinê destpê kir. Paşê endamê Yekîtiya Rewşenbîran a Efrînê Heysem Mistefa axivî û bi xêrhatina beşdaran kir. Mistefa  qala kedên nivîskar û rewşenbîrên Efrînê ji ber xebatên wan kir.

Hevserokê Yekîtiya Rewşenbîran a Kantona Efrînê Osama Ehmed jî got: "Ev meh; meha agirê Newrozê, meha Helebçe, meha serhildanê û Efrînê ye. Nivîskarên Efrînê vê mehê dê bikin meha şoreşa pênûsan, agirê Newrozê dê bibe Newroza fikr û wêjeyê."

Hevseroka Meclisa Rêveber a Fedarsyona Bakur û Rojhilatê Sûriyê Hediye Yûsif qala rola rewşenbîr û nivîskaran di ravekirina berxwedana Efrînê de ya 58 rojan tevî şert û mercên koçberiyê, kir. Hediye diyar kir ku xebatên rewşenbîran cihê rêzdariyê ye.

Piştre pirtûk hatin pêşkêşkirin û nivîskaran pirtûkên xwe mohr kirin.

Serenavên pirtûkan û navên nivîskaran wiha ne; Helebestên Zeytûnê- Entersyonalîst, Kurd-Mihemed Xeyrdîn El-Esedî, Serpêhatiyên Yesamîn-Kewser Hesen Cafer, Diyaloga Dawî-Mihemed Beko, Dengvedana Lêlûn-Komek nivîskar, Min di xewna xwe de dît-Osama Xelîl Ehmed, Rastiya Efrînê-Xelîl Musa, Berxwedanistan-Mîdiya Berekat, Romana Pakrawanên Kurd-Merwan Berekat, Ji bin siya Evînê-Mihemed Welîd, Strana Berê Xewê-Hemûdê Ebdo, Xeltiken Reş û Êş-Muhyedîn Ersalan, Efrîn Name-Zozan Mihemed.

(şx)

ANHA