Gulê Selmo li Helebê hate bibîranîn

HELEB

Gulê Selmo endama Yekîtiya Star a berê û endamê Meclisa Gel a taxa Şêxmeqsûd bû. Di 10`ê Adara 2012`an de dema ku yek ji rojnamevanên ku rastiya serhildanê radigandin, rastî revandinê tê, Gulê Selmo bi însiyatîfa xwe wê rojnamevanî xilas dike û di serê xwe de birîndar dibe. Gulê Selmo piştî 3 rojan di 13`ê Adarê de şehîd dikeve.

Kongreya Star a taxa Şêxmeqsûd a Helebê ji bo bîranîna têkoşer Gulê Selmo di salvegera şehadeta wê ya 7`an de, civînek li dar xist. Bi dehan jinên taxê beşdarî civînê bûn.

Civîn li çarexeriya Gulê Selmo a ku dikeve kolana 20’an di navbera her du taxên Eşrefiye û Şêxmeqsûd de li dar ket.

Çarxerê bi wêneyên şehîd Gulê Selmo, Rêberê Gelê Kurd Abdullah Ocalan û Leyla Guven hate xemilandin.

Piştî deqeya rêzgirtin endama rêveber a Kongreya Star Fatme Hesen axivî û kurtejiyana şehîd Gulê Selmo ji beşdaran re vegot.  Fatme destnîşan kir ku Gulê fikr û felsefeya Ocalan nas kir û tev li xebatên têkoşînê bû.

Fatme destnîşan kir ku Gulê Selmo bi baweriya ku ciwan dê tola şehîdan hilînin ciwanek bi canê xwe parast û bû hedefa guleya ajandeyên zordestiyê.

Di dawiyê de Fatme tekez kir ku ciwanên taxê îro mîrata Gulê Selmo ya ku li dû xwe hiştiye diparêzin.

Endama rêveber a Kongreya Star Şervîn Delîl tekez kir ku Gulê Selmo ya ku fikr û felsefeya Ocalan ji xwe re kiribû bingeh, bû çirûska serhildana Şêxmeqsûd.

 Civîn bi berzkirina dirûşmeyên silavkirina berxwedana jinê bi dawî bû.

(şx)

ANHA