Hejmara Êlekzeran kêm dibe

NAVENDA NÛÇEYAN

Ev 15 şemî ye xwepêşandêrên Êlekzer li Fransayê dadikevin qadan. Ajansa France Press ragihand ku mezinbûna çalakiyan di 4 hefteyên dawîn de kêm bûye. Ajansê got di hefteyên destpêkê yên Mijdarê de hejmara çalakgeran 2 sed û 82 hezar kes bû. Lê di hefteya borî de 41 hezar kes daketibûn qadan.

Li gorî daxuyaniya polîsan, îro li Parîsê 5 çalakî hebûn, jê 3 wek kombûnekê bûn. Lê 2 çalakiyên din ên ku li ser tevna civakî wek "Tsunamiya Zer" û "Em hemû li Champs-Elyseesê ne û ji ti tiştî venagerin" dê ji rex Kevana Serkeftinê saet di navbera 12:00 û 13:00’an dest pê bikin û saet 17:00’an li Qada Trocadero bi dawî bibin.

Her wiha dê kombûn li bajarên dîtir ên wekî Bordeaux û Toulousê yên ku her tim pevçûn di navbera çalakgeran û polîsan de lê derdikevin, bi rêxistin bikin.

Çalakiyên Êlekzeran wek tevgereke gelêrî di Gulana 2018’an de dest pê kir. Dûre di meha Mijdara heman salê de deng veda û bi hêz bûn. Meşvan ji ber zêdekirina buhayê sotemeniyê û madeyên jiyanî derketibûn qadan. Her wiha ji bo kêmkirina buhayan û îstîfakirina serokkomarê Fransayê Emmanuel Macron herikîbûn qadan.

(fr/bm)