Ji bermahiyan jiyanek afirand

ARŞÎN NECAR – FÎDAN ABDULLAH / ŞEHBA

Welatiya bi navê Necwa Şiblî ya ji pêkhateya Ereb a gundê Babnis ê kantona Şehbayê 38 salî ye û dayika 2 zarokan e. Beriya wê li navçeya Ehdasê dima, dibêje beriya aloziya Sûriyê wê mala xwe bi destê xwe ava kiribû û bi berhemên destê xwe mal xemilandibû.

Necwa diyar dike ku bi dagirkirina kantona Şehbayê re ji aliyê çeteyên girêdayî dewleta Tirk a dagirker rewş aloz bû û wiha parve dike: "Balafir û top em dikirin hedef, jiyana me veguherandibû felaketekê, me gelek zehmetî kişandin, me xwîn, xirabî û koçberî dît."

Necwa diyar dike ku wê qebûl nekir di bin zilma dagirkeran de bijî, ji ber ku sivîlan dikin hedef, li ser vê yekê berê xwe dide bajarê Ezazê û ji wir jî berê xwe dide bajarê Efrînê.

Malbata Necwa 5 salan li Efrînê dimîne. Necwa li ser vê yekê vî tiştî tîne ziman: "Li Efrînê tu ferq û cudahî di navbera pêkhateyan de tune bû, 5 salan li Efrînê mam, min êşa xerîbiyê hîs nekir, Efrîn xweş û ewle bû. "

Malbata Necwa piştî rizgarkirina gundê wê ji aliyê hêzên şorşgerî yên hevbeş ve ji komên çete vedigere mala xwe ya li navçeya Ehdasê ya Şehbayê, mala wê ji ber şer û topbaranê hatibû rûxandin.

Dayika Necwa bi karên ku bi destê xwe çêkirin mala xwe ji nû ve ava dike, di nava 2 mehan de mala xwe bi temamî saz kir û ji berhemên şer ku çeteyan hiştine, tiştên xweşik çêdike û pê mala xwe dixemilîne.

Necwa diyar dike ku ew ji zarokatiya xwe ve fêrî karê destan bûye, hezkirina wê ya ji vî karî roj bi roj zêde dibe û wiha dibêje: "Wêraniya ku gihîşt mala min pir mezin bû, lê niha ez li mala xwe me û di nava aramiyê de û bi vê yekê pir kêfxweş im, bi hêvî me ku ev kêfxweşî dewam bike."

 ANHA