Kargehên Reqayê ji nû ve vedibin

Gelek kargehên bajarê Reqayê ku di dema dagirkirina çeteyên DAIŞ‘ê de hatibûn girtin, careke din vedibin û roleke girîng ji bo jinûveavakirina bajar dilîzin. Ji wan kargehan yek jî kargeha Firat El-Hendesî ya çêkirina boriyên çîmentoyê ye.

CIVAK Û JIYAN

16 sibat, 2019 11:04

HEMED EL-MUSTEFA – EMAR EL-XELEF / REQA

Li bajarê Reqayê gelek kargeh hene, wekî gaz, şekir, qermît, pembo, biskuwît û çîmento. Di dema dagirkirina bajêr ji aliyê çeteyên DAIŞ‘ê û komên çete yên beriya wan de kargeh hatibûn talankirin.

Piştî rizgarkirina bajar ji aliyê QSD‘ê ve, xwediyên kargehan, kargehên xwe sererast kirin û ji nû ve vekirin.

Kargeha Firat El-Hendesî tekane kargeha çêkirina boriyên çîmentoyê li bajarê Reqayê ye. Kargeh roleke girîng di avakirina binesaziya bajar û peydakirina derfetên kar de dilîze.

Kargeha Firat El- Hendesî li bakurê bajarê Reqayê sala 2000‘î hate vekirin û bi destpêka aloziya Sûriyê ve hate girtin. Kargeh piştî rizgarkirina bajêr ji aliyê QSD‘ê ve ji nû ve hate vekirin.

Boriyên çîmento di xetên kanalîzsyon, rêgarên avê û hwd. de têne bikaranîn. Di kargehê de 40 kes dixebitin.

Xwediyê kargehê Elî El-Yasîn li ser berhemên ku kargeh derdixe wiha got: "Kargeh 7 salan hatibû girtin û ziyanên mezin dîtibûn. Piştî ewlehî li herêmê peyda bû, me hemû ziyanên wê rast kirin û kargeh ji nû ve vekir. Bi vê kargehê em hewl didin bajarê xwe ji nû ve ava bikin û derfetên kar ji welatiyan re peyda bikin, kargeh rojane ji 100- 500 metre boriyên çîmentoyê çêdike."

(jo)

ANHA