Sersaxî ji malbata şehîd Bahoz Efrînê re hat xwestin

ŞEHBA

Bi sedan şêniyên Efrîn û Şehbayê berê xwe dan konê sersaxiyê yê şehîd Kemal Osman (Bahoz Efrîn) ku li Kampa Serdem a kantona Şehbayê hatiye vedan û sersaxî ji malbata wî re xwestin.

Bi sedan şêniyên navçeya Şêrawa ya kantona Efrînê, şêniyên navçeya Til Rifet, navçeya Ehdas, şêniyên Kampa Serdem her wiha endamên komîn û meclisên kantonên Efrîn û Şehbayê tevlî merasîma sersaxiyê bûn.

Merasîma sersaxiyê bi rêzgirtinê dest pê kir. Paşê Hevserokê Meclisa Navçeta Til Rifet Mihemd Henan, Endamê Meclisa Malbatên Şehîdan a Şehbayê Mead Reslan û Endamên Meclisa Malbatên Şehîdan a kantona Efrînê Xelîl Îso û Mihmed Eco axivîn.

Di axaftinan de Komploya Navnetewî ya li dijî Rêberê Gelê Kurd Abdullah Ocalan hat şermezarkirin û hat destnîşankirin ku dewletên desthilatdar ên ku azadiyê red dikin tevlî vê komployê bûne. Her wiha hat destnîşankirin ku bi îradeya xwe komplo vala derxistin û bi îradeya xwe dê tecrîdê bişkînin.

Her wiha hat destnîşankirin ku dewleta Tirkiyê tu carî nikare îradeya gelê Kurd bişkîne ji ber ew gelekî berxwedêr in û bi fikrên Ocalan ve girêdayî ne.

Axaftivanan gotin, ji bo gel azad û aram dûrî pargalên desthilatdar bijîn, şehîdan canê xwe feda kirine, her wiha soza şopandina rêya şehîdan heta serkeftinê û rizgarkirina Efrînê hat dayîn.

Paşê bawernameya şehadetê ji aliyê Endama KPC-Demokratîk  Nezîfa Mamo ve hat xwendin û radestî malbata şehîd hat kirin.

Merasîma sersaxiyê bi drşûmeyên silavkirina berxwedana şehîdan û Berxwedan Serdemê bidawî bû.

(bx/bm)

ANHA