Greva birçîbûnê ya li Dirbêsiyê bi dawî bû

HESEKÊ

Greva birçîbûnê ya li navçeya Dirbêsiyê ya 150 kes tev lê bibûn a bi armanca rakirina tecrîda li dijî Rêberê Gelê Kurd Abdullah Ocalan û piştgirdayîna Leyla Guven di roja sêyemîn de bi dawî bû.

Çalakî ku ji aliyê Kongreya Star ve bi dirûşmeya "Bi berxwedana girtîgehan em ê tecrîdê hilweşînin" bi xwendina daxuyaniyê bi dawî bû. Daxuyanî ji aliyê rêvebera Kongreya Star Xunav Elî ve hate xwendin.

Di daxuyaniyê de hate gotin: "Wekî çalakgerên greva birçîbûnê ya navçeya Dirbêsiyê ji bo piştgirdayîna têkoşîna jina azad û berxwedana Leyla Guven me çalakî li dar xist.

14‘ê Tîrmeha 1982‘an têkoşer Kemal Pîr û hevalên li dijî faşîmza Tirk di girtîgehan de berxwedana greva birçîbûnê dest pê kiribûn, îro jî Leyla Guven wê berxwedanê zindî dike û teqez dike ku mişeleya têkoşîn û berxwedanê dewam dike ta gelê kurd bighêje azadî û rûmeta xwe û tecrîda li dijî Rêber Apo bi dawî bibe.

Rêxistinên ku qaşo banga mafê mirovan dikin, ji binpêkirinên dagirerkiya Tirkiyê der heqê Rêber Ocalan, girtî û tevahî gelê Kurd bêdeng e. Berxwedana Leyla Guven li tevahî cîhanê deng veda û rastiya rêxistinên mirovî eşkere kir.

Wekî jin, em dengê xwe didin dengê hevala xwe û banga rakirina tecrîda li dijî Rêber Ocalan dikin. têkoşîna me bi hemû cûreyên wê berdewam e ta daxwazên me bi cih werin.

Li ser vê yekê em bang li hemû jinên cîhanê dikin ku dengê xwe bibin Leyal Guven û tecrîdê li ser Rêberê Ocalan bişkînin."

ANHA