Dengbêjê navdar Baqî Xido hate bibîranîn

Şêniyên Kobanê hunermendê Kurd Baqî Xido di salvegera 10`emîn a koça wî ya dawîn de bi merasîmekê bi bîr anî.

ÇAND Û HUNER

6 sibat, 2019 13:52

KOBANÊ

Îro salvegera 10`mîn a koça dawîn a hunermendê Kurd Baqî Xidir e ku li Kobanê bi navê "Baqî Xido" tê naskirin. Di sala 2009`an, Baqî Xido jiyana xwe ji dest da, lê li pey xwe mîraseke çandî û hunerî hişt.

Baqî Xido di sala 1913`an de li navçeya Şêran a Kobanê tê dinê. Ew yek ji hunermendên dêrîn ê herêmê ye, ji biçûkaniya xwe ve ji bavê xwe fêrî stranan dibe. Baqî Xido li meclisên gundan stran distran û her kesê ku ew guhdar dikir, ji ber dengê wî yê qewîn û xweş, dikaribû bi saetan lê guhdarî bikira. Her wiha Baqî Xido bû yek ji sembolên wêjeya devkî ya kurdî.

Îro di salvegera wî ya 10`mîn de, Navenda Çand û Hunerê ya Baqî Xido li bajarê Kobanê bi merasîmeke li hola navendê ew bi bîr anî. Di merasîma bîranînê de bi dehan şêniyên bajarê Kobanê, endam û rêveberên saziyên Rêveberiya Xweser amade bûn.

Piştî deqeyeke rêzgirtinê, hevserokê Meclisa Kantona Kobanê Mistefa Îto axivî û Baqî Xido bi bîr anî û wiha got: "Baqî sembola çand û hunera kurdî li Kobanê ye."

Îto wiha domand: "Tevî hemû zehmetiyên ku rastî wî hatin, Baqî Xido parastina çand û kunera kurdî kir û dikaribû dengê xwe bigihîne hemû gelê Kurd. Divê em hemû parastina nirxên çandê ku ji me re mîras hiştin, bikin."

Endama Navenda Çand û Hunerê Evîn Berewad jî axivî û wiha got: "Hunermend Baqî Xido kesayetekî pîroz e li gel şêniyên Kobanê û hemû gelê Kurd. Baqî bi rêya stranên xwe parastina nirx û dîroka me kir."

Paşê neviyê hunermend Baqî Xido straneke wî pêşkêş kir û sînevîzyoneke li ser jiyan û stranên wî hate pêşandan. Her wiha gelek hunermendên Kobanê stranên Baqî Xido pêşkêş kirin.

Di dawiya merasîmê de şêniyan berê xwe da gundê Termîk ku gora Baqî Xido lê ye û gul danîn ser gora wî.

Baqî Xido di meşa xwe ya dirêj de bi sedan stran çêkirin û gelekî deng da. Bi dehan kasêt bi dengê xwe li ser çîrok û destanên kurdî mîna Derwêşê Evdî çêkirin û li her çar parçeyên Kurdistanê deng veda.

Her wiha Baqî Xido stran û destanên mîna Bêmal, Dilo, Delal û Memê Alan û gelek stran û destanên din strandin.

(jo)

ANHA