Minbicî li dijî gefên dewleta Tirk di nava çalakiyan de ne

Çalakiyên şêniyên Minbicê yên redkirina gefên dewleta Tirk a dagirker û çeteyên wê li ser herêmê dewam dikin. Di vê çarçoveyê de, gelê Minbicê bi dirûşmeya “Na ji dagirkeriya Tirk li ser Bakurê Sûriyê re” konê çalakiyê li taxa El-Hezawne ya Minbicê vekir.

2 ÇILE, 2019 13:25

MINBIC

Tevî bi sedan şêniyên bajarê Minbicê, endamên saziyên Rêveberiya Sivîl û endamên Meclisa Jinan tev li konê çalakiyê bûn.

Di konê çalakiyê de, hevserokê Meclisa Rêveber a Minbicê û Gundewarên Wê Mihemed Xêr Şêxo axivî û da zanîn ku baweriya gel û rêveberiya Minbicê bi Meclisa Leşkerî ya Minbicê heye û bal kişand ser rola gelê Minbicê di bersivdayîna destwerdanên derve de.

Hevserokê Komîteya Parastinê Qasim Remo jî axivî û got divê hevgirtina civakî di asta herî jor de be û diyar kir ku rêveberiya siyasî û hêzên leşkerî yên Minbicê tekane hêz in ku dikarin herêma xwe biparêzin û bi rê ve bibin.

Her wiha ji rêveberên Meclisa Jinan a Minbicê Hale Hisên jî axivî û bi lêv kir ku hemû planên têkbirina aştî û ewlehiya herêmê, dê têk biçin û wiha dawî li gotinên xwe anî: “Şêniyên Minbicê bi hemû pêkhateyên xwe dikarin planên dagirkeriya Tirk têk bibin.”

Çalakî dewam dike.

(kc)

ANHA