Minbicî: Divê her kes li dora welatê xwe kom bibe û beşdarî avakirina welêt bibe

SELWA EBDILREHMAN / MINBIC

Şêniyên bajarê Minbicê û gundên wê sersal pîroz kir, kolanên bajêr xemilandin û pêdiviyên xwe yên sersalê kirîn.

Ajansa me nerînên gelê şêniyên Minbicê girtin. Şêniyan bang li şêniyên Minbicê yên derveyî welat kir ku vegerin û hêvî kir ku ewlehî li her derê pêk were.

Şêniyê bi navê Murtede El-Cuhan koçberê ji bajarê Elbo Kemale û li bajarê Minbicê dimîne,  wiha got: "Sala 2018’an sala şer û koçberiyê bû, saleke em ji malên xwe derketine."

Murtede destnîşan kir ku ji ber ewlehiya li bajarê Minbicê wan koçî Minbicê kirin û wiha pê de çû: "Piştî ku bajarê me ji aliyê rêjîma Sûriyê ve hate bombebarankirin, ji ber çeteyên DAIŞ`ê tê de bûn em ji bajarê xwe derketin û li cihekî bi ewle geriya me berê xwe da Minbicê. Em hêvî dikin sala bê her koçberek vegere welatê xwe û ewlehî li hemû Sûriyê çêbe."

Li aliyekî din jî şêniyê bi navê Ebo Salih ku ji bajarê Heleb koç kiriye û li Minbicê dimîne, bang li şêniyên Minbicê kir ku vegerin welatê xwe û wiha got: "Ez bang li koçberên derveyî welat dikim ku vegerin welatê xwe ji ber ewlehî li vir e."

Her wiha şêniyê bi navê Beşîr El-Elî jî axivî û wiha got: "Sala 2018’an saleke tijî serkeftin bû û ji salên çûyî çêtir bû. Saleke bi xêr bû, ya herî girîng ewlehî û îstîqrar hebû". Beşîr bang li şêniyên herêmê kir ku li dora welatê xwe kom bibin û dev ji şer berdin û wiha got: "Divê her kes vegere welatê xwe û beşdarî jinûveavakirina welêt bibe."

(jo)

ANHA