Girkê Legê şehîdê Şerê Tinekirina Terorê spartin axê

QAMIŞLO

Girseya gel cenazeya şehîd Îmad El-Mensûr (Zewba Ednan) ji ber nexweşxaneya Hogir a bajarê Dêrikê wergirtin û bi kerwanekî wesayîtan ber bi goristan şehîdan a navçeya Til Koçerê ve ketin rê.

Piştî ku şênî gihîştin goristanê merasîm bi toraneke leşkerî ji aliyê şervanên YPG`ê ve hate destpêkirin.

Piştre ji fermendarên YPG'ê Xalid Dara axivî û got: "Erdogan emîrê çeteyan e. Gefa êrîşan li herêmê dixwe û hewl dide tevliheviyê di navbera şêniyên herêmê de derbixe."

Xalid Dara got çawa çeteyên DAIŞ'ê û komên din ji herêmê hatin qewirandin dê terora Erdogan jî tune bibe.

Ji aliyê xwe ve endamê Meclisa Malbatên Şehîdan Qehreman Mihemed jî axivî û destnîşan kir ku gelên herêmê dê li hember her êrîşeke Tirkiyê bisekinin û dê rê nedin Erdogan ku ewlehî û aramiya herêmê têk bibe.

Di dawiya axaftina xwe de Mihemed bang li gelên Bakur û Rojhilatê Sûriyê kir ku yekîtiya xwe xurt bikin, li dora hêzên xwe yên leşkerî li hev kom bibin û bi îdiayên Erdogan yên ku têkbirina projeya Netewa Demokratîk û vegerandina xewna Osmanî bi zihniyeta DAIŞ'ê armanc dike, neyên xapandin.

Piştî axaftinan, wesîqeta şehadetê ji aliyê Meclisa Malbatên Şehîdan ve hate xwendin û  radestî malbata şehîd hate kirin. Di dawiya merasîmê de girseya gel cenazeyê şehîd di nav tilîliyên dayîkan de veşaratin.

(şx)

ANHA