Di merasîma oxirkirina şehîdan de şêniyên Şedadê gefên dewleta Tirk red kirin

HESEKÊ

Bi sedan şêniyên navçeya Şedadê cenazeyên şervanên QSD`ê Bedir El-Celal (Asîfa), Mihemed El-Xelîf (Behir), Abdulrehman El-Siûd (Ebûd) û Beşar Xilêf (Dilyar) ji Meclisa Malbatên Şehîdan a bajarê Hesekê wergirtin û bi karwanekî ber bi goristana şehîdan a Şedadê ve ketin rê.

Merasîmê bi rêzgirtinê dest pê kir, her wiha şervanên YPJ/YPG`ê toreneke leşkerî li dar xist. Paşê ji fermandarên YPG`ê Elî Şedadî axivî û sersaxî ji malbatên şehîdan re xwest.

Şedadî di axaftina xwe de destnîşan kir ku armanca gefên dewleta Tirk a dagirker li dijî herêmên Bakur û Rojhilatê Sûriyê ew e ku ji nû ve çeteyên DAIŞ`ê ku ji aliyê şervanên QSD`ê ve derbeyên giran dixwin, vejîne.

Şedadî teqez kir ku gefên dewleta Tirk tu carî nikarin yekitiya gelê herêmê parçe bike lê belê îrade û israra wan a ji bo berxwedanê li dijî dijminan zêde dike.

Şedadî got şervanên QSD`ê tu carî derfet nadin dagirkeran ku destkeftiyên wan binpê bike, xaka wan dagir bike û wiha dawî li axaftina xwe anî: "Ji bo em parastina ax û gelê welatê xwe bikin em ê her tiştê giranbuha bikin qurban."

Her wiha endamê Saziya Malbatên Şehîdan a Şedadê Nacî Nicûm diyar kir ku ew wek malbatên şehîdan tu carî derfet nadin dagirkeran ku kiryarên çeteyên DAIŞ`ê careke din li ser xaka wan dubare bikin û dê heta dawiyê li dijî dagirkeriya Tirkiyê li ber xwe bidin.

Paşê wesîqetên şehadetê ji aliyê endamê Saziya Malbatên Şehîdan Selman El-Salih ve hatin xwendin û radestî malbatên şehîdan hatin kirin.

Di dawiya merasîmê de cenazeyên her çar şehîdan di nava dirûşmeyan de hatin oxirkirin.

(bx)

ANHA