Bi hatina zivistanê re azarên gelê Efrînê zêdetir dibin

Şêniyên Efrînê ku rastî êrîşên herî dijwar hatin, li kampên Şehbayê di nava şert û mercên zehmet de jiyana xwe didomînin. Bi hatina zivistanê û barîna baranê re azarên wan girantir dibin, tevî vê yekê berxwedana xwe didomînin.

NÛÇE

21 kanûn, 2018 09:40

CEFER CEFO – XANDÎ ELO / ŞEHBA

Duh êvarê li kantona Şehbayê baraneke zêde bariya, di encamê de lehî rabû û bi dehan mal hilweşiyan.

Şêniyan diyar kir ku zêdetirî 20 salan e tiştekî wiha nebûye, ji ber lehiyê bi dehan malên şêniyên Efrînê hilweşiyan, her wiha malên li gundê Helîsê jî ketin bin avê û li gelek gundên din ên kantona Şehbayê lehî rabû.

Der barê mijarê de, gelek şênî ji ANHA`yê re axivîn. Şêniyê ji Efrînê yê bi navê Mihemed Qesîr wiha got: "Em li mal bûn, ji nişka ve me dît av hat û mal di bin avê de ma, bi 400 hezar lîreyên Sûriyê bi cil kirin ku ez bifiroşim, hemû di bin avê de man, lê em ê li vir bimînin û li ber xwe bidin heta ku Efrîn bê rizgarkirin.”

Her wiha şêniya bi navê Zerîfe Mihemed destnîşan kir ku hemû pêdiviyên wan ên malê xirab bûn û wiha got: "Ji ber hovîtiya çeteyan em ji Efrînê derktin û me berê xwe da Şehbayê, duh baraneke pir bariya û zirarên madî derktin lê ev yek vîna me naşikîne, em hîna zêdetir berxwedana xwe zêde dikin û em ê her tiştî tehemul bikin ku vegerin Efrînê."

Rêveberiya Xweseriya Demokratîk û şaredariyên gel ên kantonê, alîkariyê digihînin şêniyan.

ANHA