Di merasîma sersaxiya keça xwe de soza şopandina rêya hemû şehîdan da

QAMIŞLO

Bi hezaran şêniyên herêma Dêrikê sersaxî ji malbata şehîd Ronak Adalt re xwest ku li Herêmên Parastina Medyayê şehîd bû.

Şêniyên herêma Dêrikê, navçeyên wê, şervanên YPJ/YPG’ê, hêzên Asayîş û Trafîkê berê xwe da Navenda Şehîd Bawer a Ciwanên Şoreşger da ku sersaxiyê ji malbata şehîd re bixwazin.

Merasîma sersaxiyê bi rêzgirtinê dest pê kir. Paşê bi navê hêzên leşkerî fermandar Mihyedîn Xêrikî axivî û sersaxî ji bo malbata şehîd û şervanên ku ji bo parastina destkeftiyên Bakurê Sûriyê û rizgarkirina şêniyan ji zilm û zora çeteyên DAIŞ`ê di çeperan de şer dikin, xwest. Xêrikî soza şopandina rêya hemû şehîdan heta pêkanîna xewn û xeyalên şehîdan da.

Her wiha di merasîmê de bi navê Kongreya Star, Melisa Malbatên Şehîdan, PYD, Komîteya Amadekar a çalakiya greva birçîbûnê û Meclisa Kampa Newroz axaftin hatin kirin û hate teqezkirin ku dê têkoşîn û berxwedana xwe heta rizgarkirina hemû xaka Bakur û Rojhilatê Sûriyê dewam bikin.

Bi navê malbata şehîd, bavê şehîd Salih Ehmed axivî û destnîşan kir ku ew bi şehadeta keça xwe ya ku da ser rêya apên xwe yên şehîd, serbilind e.

Di dawiya merasîmê de wesîqeta şehadetê hate xwendin û radestî malbata wê hate kirin.

Merasîma sersaxiyê bi dirûşmeyan bi dawî bû.

(bx)

ANHA