‘Ji bo avakirina weletekî azad û demokratîk şehîd canê xwe feda dikin’

QAMIŞLO

Bi sedan şêniyên bajarê Qamişlo berê xwe da konê sersaxiyê yê fermandarê Meclisa Leşkerî ya Minbicê Xelîl Ebîd (Ebû Seyah) ku di qonaxa dawîn a hemleya Bagera Cizîrê ya bi navê Şerê Tunekirina Terorê de şehîd bûbû û sersaxî ji malbata wî re xwest. Konê sersaxiyê li taxa Hilêliyê ya bajarê Qamişlo hate vedan.

Şervanên YPJ/YPG`ê, endamên meclisên bajêr, endamên Meclisa Malbatên Şehîdan, endamên PYD`ê tev li merasîma sersaxiyê bûn. Konê sersaxiyê bi wêneyên şehîdan, wêneyên Rêberê Gelê Kurd Abdullah Ocalan û alên YPJ/YPG`ê hate xemilandin.

Bi navê Meclisa Malbatên Şehîdan a bajarê Qamişlo Elî Emer, bi navê PYD`ê ya bajarê Qamişlo Haşim Hiso, bi navê YPG`ê Gabar axivîn û sersaxî ji malbata şehîd re xwestin. Axaftvanan teqez kir ku şehîd ji bo avakirina welatekî azad û demokratîk ku hemû pêkhateyên Bakurê Sûriyê di bin banê wê de bijîn, canê xwe feda dikin.

Her wiha hate destnîşankirin ku gelek dewletên cîhanî û erebî hewl didin projeya neteweya demokratîk li herêmên Bakur û Rojhilatê Sûriyê têk bibin lê bi saya berxwedan û têkoşîna şervanên QSD û YPJ/YPG`ê hemû hewldanên wan têk diçin.

Merasîm bi dirûşmeyên dilsoziya bi şehîdan re bi dawî bû.

(bx)

ANHA