‘Ji roja ku PYD hate avakirin ve, rastî komployan tê’

QAMIŞLO

PYD`ê li navçeya Tirbespiyê bi civînekê têkoşer Şîlan û her 4 hevrêyên wê yên damezirînerên PYD`ê, bi bîr anîn. Civîn li Akademiya Şehîd Yekta Herekol a navçeyê hate lidarxistin. Bi dehan pêkhateyên navçeyê û endamên partiyan tev li civînê bûn.

Civînê bi rêzgirtinê dest pê kir. Paşê ji rêveberên PYD`ê li navçeya Tirbespiyê Dîrok Mele Beşîr bixêrhatine beşdaran kir û destnîşan kir ku ew ê heta dawiyê şopdarên rêya şehîdên tevgera azadiyê bin.

Di civînê de nûnerê PYD`ê yê başûrê Kurdistanê Silêman Ereb diyar kir ku ji destpêka ku PYD hate avakirin, rastî komployan hat, ji bo fikrên azadî û demokrasiyê di navbera pêkhateyên Bakur û Rojhilatê Sûriyê de ku fikrên azadiyê nas kirine belav nebin, damezirînerên wê kirin hedef. Ji ber ku dijmin baş dizane fikrên partiyê dûrî desthilatdarî û zilmê ne û rêya rizgarkirina gelê herêmê ye.

Ereb destnîşan kir ku gelek hêz hene li ser xaka Sûriyê şer dikin, lê hêza tekane ya ku fikrên rizgarî û demokratiyê pêk tîne QSD ye û wiha pê de çû: "Tenê ji mafê QSD`ê ye ku parastina xaka Sûriyê bike. Ji ber ku ew ji zarokên herêmê hatiye avakirin û baweriya wan heye ku Sûriye ya gelê Sûriyeyê ye."

Ereb diyar kir ku gel bûye xwedî bawerî, hêz û moralên xwe ji şehîdên ku dîrokeke nû bi xwîna xwe nivîsandine digire, bi saya fikr û felsefeya Rêberê Gelê Kurd Abdulah Ocalan civaka demokrat û azad ku hemû pêkhate bi azadî û aramî tê de dijîn, hate avakirin.

Di dawiya civînê de sînevîzyonek li ser kurtejiyana têkoşer Şîlan Kobanê û her 4 hevrêyên wê hate pêşandan.

Hêjayî bi bîrixstinê ye ku Rêvebera PYD`ê Meysa Baqî (Şîlan Kobanê), Zekeriya Îbrahîm (Zekeriya), Hikmet Tokmak (Fûad), Nebû Elî (Cemîl) û Hacî Cûma Elî (Ciwan) 29`ê Mijdara 2004`an li bajarê Mûsilê di enacama komployeke navdewletî de şehîd bûn.

(bx)

ANHA