Kehrebe ji nû ve gihaşt ji sedî 80 gundên rojhilatê Reqayê

EHMED EL-ESAF / REQA

Piştî bajarê Reqayê ji aliyê şervanên QSD`ê ve ji çeteyên DAIŞ`ê hate rizgarkirin, Rêveberiya Sivîl a Demokratîk dest bi vekirina saziyên xizmetguzariyê kir ku xizmeta şêniyan dikin.

Saziya Kehrebeyê li herêma El-Keramê di dîroka meha heftan a 2018’an de hate vekirin û saziyê dest bi sererastkirina şebekeyên kehrebeyê li herêmê kir.

Saziyê dest bi sererastkirina xetên xizmetguzariyê û xetên hundirê bajarok û gundan kir, ji ber ku şebekeyên kehrebeyê li herêmê xirab bûbûn û her tişt hatibû dizîn.

Der barê mijarê de endamê rêveberiya Saziya Kehrebeyê li herêma El-Keramê Ehmed El-Ekreş destnîşan kir ku saziyê dest bi karê xwe kir ku kehrebeyê dide stasyonên ava vexwarinê û pompên avê ku xizmeta şêniyan dike. El-Ekreş wiha got: "Xeta 20 KF hate sererastkirin, hin rêxistinan 6 transên kehrebeyê dan me, me jî kehrebe li ser bajarokên El-Hemrat, El-Keramê, Reqa û Semrê û mezre û bejahiya wê belav kir. Her wiha xeta El-Mexlê ku kehrebeyê dide bajarokê El-Hûs û El-Cedîdat sererast kir. Niha kehrebe gihaştiye aliyekî bajarokê El-Cedîdat û aliyê din jî hîna tê sererastkirin."

El-Ekreş destnîşan kir ku bajarokê El-Hûs li benda sererastkirinê ye, ji ber ku 12 transên kehrebeyê hatine dizîn û xetên kehrebê gihandin ji sedî 80 ji malên şêniyên gundên rojhilatê Reqayê.

Di dawiya axaftina xwe de endamê rêveberiya Saziya Kehrebeyê li herêma El-Keramê Ehmed El-Ekreş got karê wan dê dewam bike, heta ku xetên kehrebeyê li hemû gundan û bajarokên gundên rojhilatê Reqayê bêne sererastkirin.

(jo)

ANHA