'Bingeha serekeftina Kobanê ramanê Ocalan e‘

HESEKÊ

Bi boneya 1'ê Mijdarê Roja Cîhanî ya Piştgiriya Kobanê bi sedan şêniyên navçeya Dirbesiyê ya Kantona Hesekê û gundên girêdayî wê şahiyek lidar xistin.

Şênî li qada Geracê hate lidarxitin. Cihê şahiyê bi wêneyên Rêberê Gelê Kurd Abdullah Ocalan, alên YPG,YPJ'ê, wêneyên şehîdan  û pankartên ku li ser 'Em êrîşên dewleta Tirk li dijî Rojava şermezar dikin, Bi giyana berxwedana Kobanê em ê Efrîn rizgar bikin' hatibû xemilandin.

Şahî bi deqeyek rêzgirtin destpê kir. Piştre endama Meclisa Malbatên Şehîdan Hindiyê Bekir bi navê meclisê axivî û bi xêrhatina şêniyan kir. Hindiyê diyar kir ku bi saya xwîna şehîdan, fikr û felsefeya Rêberê Gelê Kurd Abdullah Ocalan û berxwedana gel herêm ji terorê rizgar bû.

Ji aliyê xwe ve fermendara YPJ'ê, Agirî Şînda axivî û got: "Em vê rojê li Rêberê mirovahiyê Ocalan pîroz dikin û em vê rojê wê weke rojekî dîrokî ji gelê Kurd re dihesbînim."

Agirî Şînda êrîşên dewleta Tirk a dagirker ên li dijî xaka Sûriyê şermezar kir û wiha domand: "DAIŞ'ê bi desteka Trikiyê bi çekên giran êrîşî Kobanê kirin. Lê şervanên me yên ku li ser fikrên Rêberê Gelê Kurd perwerde bûne bi xwîna xwe Kobanê rizgar kirin û hemû planên wan têk birin û Kobanê bû destpêka dawiya DAIŞ'ê."

Piştre koma Kîkan stranên şoreşgerî pêşkeş kirin û şêniyan xelekên govendê gerandin.

Şahî bi berzkirina dirûşmeyên silavkirina Kobanê bi dawî bû.

(şx)

ANHA