Nexweşxaneya Niştîmanî serê salê vedibe

Komîteya Tenduristiyê ya Meclisa Sivîl a Reqayê bi armanca pêşkêşkirina xebatên tenduristiyê û ji bo pêşxistina warê tenduristiyê gelek navendên tenduristiyê vekirin. Her wiha komîteyê niha xebatên Nexweşxaneya Niştîmanî dimeşîne û tê payîn ku di destpêka sala bê de ev xebat bi dawî bibe.

CIVAK Û JIYAN

25 cotmeh, 2018 09:02

EMAR EL-XELEF / REQA

Piraniya nexweşxane û navendên tenduristiyê yên bajarê Reqayê di 4 salên dawîn de di encama wêrankirina DAIŞ'ê de, gelekî wêran bûbûn.

Li bajarê Reqayê 39 noqteyên tenduristiyê bi her du beşên xwe yên taybet û giştî rastî talankirinê hatin. Jê 30 bi temamî wêran bûne û 9 jî bi awayekî beşî hatine wêrankirin.

Piştî ku şervanên QSD'ê bajarê Reqayê rizgar kir, Meclisa Sivîl a Reqayê biserxistina warê tenduristiyê da ber çavê xwe. Meclisê bi armanca pêşkêşkirina xebatên tenduristiyê ji şêniyan re gelek noqteyên tenduristiyê û yekîneyên gerok vekirin.

Ji destkeftiyên komîteyê yên herî girîng vekirina navenda bankeya xwînê ya bi navê Seyf El-Dewla li navenda bajêr û navenda Nexweşiya Telesîmiya ya ku nexweşên wê navendê 221 nexweşan derbas kiriye. Ev navend dermanên pêwîst bi awayekî asayî bê pere pêşkêş dike û xwînê ji nexweşan re vediguhezîne.

Her wiha komîteyê 16 navendên aşlekirinê li piraniya taxên Reqayê û gundewarên wê vekirin. Heta niha jî 11 hemleyên aşlekirinê li bajêr û gundewarên wê orgenîze kirine û her wiha erebeyên destwerdana lezgîn ên gerok ji şêniyan re eyar kirine.

Komîte niha xebatên amadekirina beşa şûştina gurçikan bi hevkariya rêxistina Bijîşkên Bêsînor dimeşîne û dê li beşa jêrîn a Nexweşxaneya Niştîmanî veke.

Her wiha komîteyê rûxseta 8 nexweşxaneyên taybet li bajêr û 3 li gundewaran dane û rûxsetên dermanxaneyan ji hejmareke dermanfiroşan re dane.

Li gorî serokê Komîteya Tenduristiyê yê Meclisa Sivîl a Reqayê Ehmed Ismaîl, xebatên restorekirina Nexweşxaneya Niştîmanî berdewam in û her wiha tekez kir ku nexweşxane dê di destpêka sala 2019'an de dest bi xebatê bike.

(şx)

ANHA