“Dirûşma me vegera li Efrînê ye”

Şêniyên Efrînê yên di Kampa Serdem de dimînin, tekez kir ku heta vegerin Efrînê dê têkoşîna xwe bidomînin.

25 cotmeh, 2018 08:45

ARIF SILÊMAN / ŞEHBA

Piştî ku dewleta dagirker a Tirk û çeteyên wê êrîşî Efrînê kir, şêniyên Efrînê di 18'ê Adarê de neçar man ji welatê xwe derkevin. Şêniyan da zanîn ku ew ji bajarê xwe derketin lê ew ê vegerin.

Ajansa me nêrînên şêniyên Efrînê yên di Kampa Berxwedan a li Kantona Şehbayê de girtin.

Şêniya bi navê Leyla Hesen wiha axivî: "Li vir em gelek zehmetiyan dikişînin, lê ev nabe asteng li pêşiya me ku em berxwedana xwe bidin sekinandin, çawa me zehmetiyên havînê derbas kirin, em ê zehmetiyên zivistanê jî tehemûlê lê bikin."

Fayîq Hebîb jî anî ziman ku dewleta Tirk nikaribû jiyana hevbeş di nava wan de tehemûl bike, balafirên xwe bi ser wan de anîn û her tişt şewitand, tevî wê jî 58 rojan di berxwedana serdemê de li ber xwe dan û diyar kir ku heta dawiyê dê li ber xwe bidin û dawiya dawîn vegerin Efrînê.

Şêniyê bi navê Ferhad Elûş got ku ew 7 meh e li ber xwe didin û wiha pê de çû: “Em li kêleka şervanên xwe disekinin, mayîna me li kantona Efrînê ne dereng e, em ê vegerin Efrînê, dirûşma me vegera li Efrînê ye."

(jo)

ANHA