Tov li cotkarên Dêrazorê tê belavkirin

Komîteya Çandiniyê ya Dêrazorê dest bi belavkirina tovê genim li cotkarên gundewarên Dêrazorê bi buhayekî ji bazaran erzantir kir.

15 cotmeh, 2018 09:04

DÊRAZOR

Gundewarên Dêrazorê ji ber ku çemê Firatê tê re derbas dibe, bi axa xwe gelekî dewlemend e û ji gelek çandiniyan re jî guncaw e.

Komîteya çandiniyê ji bo pêşxistina beşa çandiniyê û alîkariya bi cotkaran re gelek kooperatîfên çandiniyê ava kirin û alîkariya wan kir.

Berhema sala borî ya genim û pembo li herêmê rastî ziyanên mezin hat. Bi armanca alîkariya bi cotkaran re Komîteya Çandiniyê ya girêdayî Meclisa Sivîl a Dêrazorê 500 ton tovê genim ê paqijkirî û bêjingkirî bi buhayekî erzan li cotkaran belav dike. Kîloya tovê genim bi 160 lîreyên Sûriyeyê tê belavkirin.

Girêdayî mijarê hevseroka Komîteya Çandiniyê Şêrîn Mesûd wiha got: "Meclisa Sûriya Demokratîk 500 ton tovê çandiniyê radestî wan kiriye û ji bo pêşxistin çandiniyê li herêmê dê vê jî li cotkaran belav bikin û bi hemû hêz û derfetên xwe alîkariya cotkaran bikin.”

ANHA