Şêniyên Dêrazorê şehîdên "Şerê Tinekirina Terorê" oxir kirin

DÊRAZOR

Şervanên QSD‘ê Elî Xilêf El-Şaban (Qeyser), Ebdulsetar El-Dawî (Salih), Seed Xelef El-Abdullah (Salar) û Salim Xelef El-Abdullah (Tofan) yên ku di qonaxa dawîn ya Pêngava Bagera Cizîrê ya Şerê Tinekirina Terorê bibûn.

Bi dehan şêniyên bajaroka El-Bisêra û gundê Baxor ê gundewarê Dêrazorê, şervanên QSD‘ê, nûnerên saziyên sivîl û Partiya Sûriyeya Pêşerojê beşdarî merasîmê oxirkirina cenazeyên her çar şervanan bûn.

Merasîmê bi bîranîna cangoriyên azadiyê û turaneke leşkerî ji aliyê şervanên QSD‘ê ve dest pê kir. Paşê bi navê Meclisa Sûriyeya Demokratîk Fîras Elî axivî û sersaxî ji malbatên şehîda re xwest. Elî  got: "Em bejna xwe li hemberî giyanên şehîdan ditewînin, bi ked û berxwedaniya wan herêmên me terorê hatin rizgarkirin û aramî pêk hat. Em soz didin şehîdan ku em ê xeta têkoşînê berdewam bikin ta tevahî herêmê ji çeteyan rizgar bikin."

Bi navê Saziya Malbatên Şehîdan rêveberê meclisê Wîsal Hezai jî di merasîmê de axivî û ev tişt got: "Her ku em şehîdekî oxir dikin îsrara me ya berxwedanê zêde dibe û em herêmên nû rizgar dikin. Her ku em şehîdekî oxir dikin ewqas em nêzî azadiyê dibin, şehîd yên ku ji bo azadî û rûmeta me berdêl dane ne, em soza parastina destkeftiyên wan didin."

Bi navê Partiya Sûriyeya Pêşerojê û Meclisa Sivîl a Dêrazorê axaftin hatin kirin û ji malbatên şehîdan re sersaxî hatin xwestin, her wiha berxwedana QSD‘ê hate silavkirin.

Rêvebera Saziya Malbatên Şehîdan Wefa Celal nasnameyên şehîdan xwendin û radestî malbatên wan kirin.

Şêniyan cenazeyên şehîdan bi dirûşmeyên dilsoziya bi şehîdan re veşartin.

ANHA