Peymangeha Zanistên Perwerdeyî navenda pêşxistina ciwanan e

HEMÎD EL-ELÎ / REQA

Piştî ku çîna ciwanan hatibû paşguhkirin, peymangeh hewl dide asta ciwanan bi pêş bixe.

Peymangeha Zanistên Perwerdeyî ya Ciwanan a li Mezret El-Hikumiyê y gundewarên bakurê Reqayê di 16`ê Îlona sala borî de bi armanca perwerdekirina ciwanan, pêşxistina wan ji bo avakirina civakekE demokratîk û azad û da ku ciwan bi rola xwe ya çalak di civakê de û pêşxistina wê bilîzin, hate vekirin.

Ji destpêka vekirinê ve û heta niha ji peymangehê 5 dewre bi tevlêbûna 200 ciwanan ji Reqa û gundewarên wê derçûne. Beriya vê bi çend rojan peymangehê dewreya 6'emîn bi tevlêbûna 37 ciwanan vekir.

37 ciwan jê 24 xort û 13 keç, tev li dewreyê bûn. Dewre dê 40 rojan bidome. Di dewreyê de waneyên fikrî, zanistî û çandî û her wiha waneyên pratîk girêdayî fêrkirina bikaranîna kamera û kompîturê dê werin dayîn.

Dewre saet di 6:00'an de bi werzîşê dest pê dike. Piştre ciwan bi hev re taştê dixwin. Wane  saet di 8:00'an de dest pê dikin û heta 11:00'an didomin. Piştre navbera nîvro dest pê dike û heta 13:00'an piştî nîvro didome. Paşê wane dest pê dikin û heta saet 4:00'an didomin.

Piştî bidawîbûna waneyan ciwan li hev rûdinin û li ser waneyan nîqaş dikin. Di dema şevê de ji ciwanan re belgefîlm an jî semîner tên dayîn.

Têkildarî mijarê hînbera bi navê Rîhab Remadan El-Şîxan wiha got: "Ji bo ku ez kesayeta xwe xurt bikim û rola xwe bi awayekî çalak di civakê de bilîzim ez tev li dewreyê bûm. Bi vî awayî min ji xwe re bi taybet û ji bo jinan bi giştî riyeke nû di rêya azadiyê de xêz kir."

Girêdayî heman mijarê endamê rêveber ê Peymangeha Zanist û Perwerdeyî ya Ciwanan Ehmed Osman wiha got: "Armanca me ji van dewreyan zanakirin û xurtkirina vîna ciwanan a serkeftî ye. Ji ber ku ciwan bingeha avakirina Sûriyeyeke azad û demokratîk e. Ji bo avakirina ciwaneke şoreşger, ez şîret li ciwanên Reqayê dikim ku ji bo ji nû ve bajarê xwe ava bikin, tev li akademiyan bibin."

(şx)

ANHA