Cotkarên Tebqayê berhema pembo radestî Gerînendetiya Çandiniyê kir

MIHEMED HIYAWÎ / TEBQA

Rêveberiya Gerînendetiya Çandiniyê ya Tebqayê da zanîn ku wan dest bi pêşwazîkirina berhema pembo li herêmê kir, radestkirina pembo li herêma Kebeş a girêdayî bajarê Reqayê di dîroka 25'ê Îlonê de dest pê kiriye.

Îsal berhema pembo ji ber belavbûna kurman û taybet kurmê loz ji sedî 85 xerab bû. Sedema vê yekê jî cotkaran tovê pembo yê Tirkiyeyê bi kar aniye.

Hevserokê Gerînendetiya Çandiniyê li Tebqayê endezyar Xalid El-Esker buhayê berhema pembo li gorî çêkirina pembo diyar kir û got ji 290 lîreyên Sûriyeyê heta 255 lîreyan ew li gorî cureyê pembo dikin û dê buhayê pembo li hemû herêmên bakurê Sûriyeyê bibe yek.

El-Esker da zanîn ku berhema îsal ne baş bû, ji ber ku kurm lê ketin û bi taybet kurmê lozê ku ji 2 cureyan pêk tê; cureyên şewkî û qurnefîlî, ew jî ji ber cureya tovê ku ji Tirkiyeyê tê.

Li ser cureyê torên ku pembo dikevê El-Esker wiha got: "Pêşwazîkirina berhema pembo ji torên tenê cureyê şilûl, dema ku cotkar berhemên xwe di tora naylon de bîne dê bi buhayê 6 kîlogram be, ji ber ku tora naylon tav lê dikeve û hemû tê bêbandorkirin, ev jî dibe sedema ku hinek jê xerab bibe."

Cotkar heta niha berhemên xwe yên pembo tînin û ji ber ku pembo zirar dît, aciz in.

(jo)

ANHA