Bi hezaran zêviyên çandiniyê dê ji nû ve geş bibe

Meclisa Sivîl a Reqayê bi hevkariya Rêxistina "Afaq Cedîda" bi merasîmekê dest bi sererastkirina pompa avê ya herêma Til Semin kir.

12 îlon, 2018 13:59

GIRÊ SPÎ

Nûnerên meclisên herêmî, bi dehan şêniyên herêmê û şandeyek Koalîsyona Navdewletî û Rêveberiya Xweseriya Demokratîk a Kantona Girê Spî beşdarî merasmê vekirina projeyê bûn.

Beriya ku xebatên projeyê dest pêk bike, axaftin hatin kirin.

Bi navê Meclisa Kantona Girê Spî Hemdan El-Ebid, bi navê komîteya Xizmetguzarî Îzet El-Herma, bi navê Meclisa Til Semin Xelef El-Îyada û bi navê Meclisa Sehlebiya Fatima Hisên axaftin hatin kirin.

Kesên axivîne vekirina projeyê pompa Til Semin li şêniyan pîroz kirin û gotin, ev proje dê jiyanê ji nû ve li herêmên bakurê Reqayê û Girê Spî vegerîne, her wiha spasiya kesên ji bo vekirina projeyê kedê didin û endamên Rêxistina Afaq Cedîda kirin.

Di axaftinan de hate gotin, ev proje dê bi hezaran donim zeviyên çandiniyê yên Til Semin û Hîşê av bide û aboriya herêmê ji nû ve geş bike.

Her wiha hate diyarkirin, ev proje dê 75 rojan berdewam bike û dê zeviyên genim ê avî av bide.

Pompa avê ya Til Semin sala 2000 hate vekirin, 16 donim zeviyên li herêma Til Semin û Hîşayê ava dike, her wiha ava paqij dide du stasyonên avê û bi dehan gundan. Çeteyên DAIŞ‘ê dema herêm dagir kiribûn pomp xirab kiribûn û alavên wê dizî bûn.

ANHA