Şaredariya Eyn Îsa dest bi sererastkirina rêyan kir

Şaredariya Gel a Eyn Îsa dest bi sererastkirina rêya di navbera Eyn Îsa û Mişêrfet Reca de kir. Her wiha rêya Sebe Fecar û Ebû Heye ya ku bi dehan gund û navendên navçeyê bi hev ve dide girêdan, tê sererastkirin.

NÛÇE

9 îlon, 2018 08:13

GIRÊ SPÎ

Şaredariya Gel a navçeya Eyn Îsa ya girêdayî kantona Girê Spî li ser xwesteka şêniyan û gazincên wan ji ber xirabûnê rê, dest bi sererastkirinê kir. Destpêkê dê şaredarî rêyan sererast bike da ku di demên pêş de û li gorî derfetên xwe îsfelt bike.

Rêya Eyn Îsa – Mişêrfet Reca bi dirêjiya 7 kîlomietre ye. Ew rê xizmeta gundên rojavayê navçeya Eyn Îsa mîna Elmestûr, El-Eliyat, El-Ewîdiye, Mişêrfet Reca dike.

Kar û xebatên sererastkirinê dê 50 rojan dewam bikin. Projeya sererastkirinê bi buhayê 25 milyon lîreyên Sûriyeyê ye.

Di vê çarçoveyê de hevserokê Komîteya Fenî ya Şaredariya Gel a Eyn Îsa Osman Bozî destnîşan kir ku sererastkirina wan rêyan yek ji projeyên ku şaredariyê ji bo xizmeta şêniyan dest pê kir, her wiha da ku tevgera wan hêsan bibe û gund û bajar bi hev ve werin girêdan.

Niha rêya Eyn Îsa – Mişêrfeta Reca tê sererastkirin, her wiha rêya Sebe Fecar – Ebû Heyê bi dirêjiya 10 kîlometre tê sererastkirin.

(bx)

ANHA