Îbrahîm Derwîş li Serêkaniyê hat oxir kirin

HESEKÊ

Bi sedan welatiyên bajar û gundewarên Serêkaniyê ji bo oxirkirina cenazeyê şervanê YPG`ê Îbrahîm Derwîş (Aram Kobanê) ku di 29`ê Tebaxê 2018‘an de di encama qezaya tirafîke de şehîd bibû, li ber Nexweşxaneya Roj a Serêkaniyê kom bibûn. Piştî ku cenaze  wergirtin û bi karwanekî berê xwe dan goristana şehîdan a Serêkaniyê.

Li goristanê merasîm bi bîranîna cangoriyên azadiyê hate destpêkirin.

Bi navê Meclisa Malbatên Şehîdan a Serêkaniyê rêveberê meclisê Cesûr Ehmed axaftin kir. Ehmed got: “Em ji tevahiya gelê xwe re dibêjin ku em bi îradeya xwe ya polat û rihê fedekarî berxwedana me ya parastina destkeftiyên şehîdan didomînin. Em soz didin şehîd Aram û hemû şehîdên ku em ê tola wan li erdê nehêlin û xeta wan bişopînin heta armancên wan bi cih bînin.‘‘

Her wiha ji fermandarên YPG`ê Azad Welat jî soza şopandina rêya şehîdan û parastina destkeftiyên şoreşê da û got ji bo jiyaneke azad û bi rûmet berdêlên giran hatin dayîn, li ser vê yekê pêwîst e ev berdêl werin parastin û xwedî li nirxên şehîdan werin derketin.

Piştî axaftin bi dawî bûn, wesîqeta şehîd hatin xwendin û radestî malbata wan hate kirin. Di dawiya merasîmê de, şervanên YPG`ê cenazeyê hevalê  xwe bi dirûşmên ``Şehîd namirin`` veşartin.

(sx)

ANHA