Li Reqayê nexweşên laşmanyayê têne dermankirin

Berpirsê navenda tenduristiyê ya gerok diyar kir ku wan 143 kesên bi nexweşiya laşmanyayê ketine pêşwaz kiriye, ji vê hejmarê 52 nexweş hatin dermankirin û nexweşên din jî hîne têne tedawîkirin.

23 tebax, 2018 08:22

FÎRAS TEYAWÎ / REQA

Komîteya Tendurisityê ya girêdayî Meclisa Sivîl a Reqayê li herêma El-Keramayê û gundewarên rojhilatê Reqayê kampanyaya dermankirina ji nexweşiya laşmanyayê dabû destpêkirin.

Pêngav ji destpêka meha Gulanê ve destêpê kiribû, kampanyayê di nav xwe de herêmên li rojhilatê Reqayê El-Himêrat, Cidêdat û Hos girtiye.

Berpirsê navenda tenduristiyê ya gerok Elî El-Îbrahîm anî ziman ku ekîpa navendê dişînin herêmên ku îhtîmala belavbûna nexweşiya laşmanyayê lê heye ji ber qirêjê. El-Îbrahîm destnîşan kir ku di serî de sedema sereke ya belavbûna nexweşiyê hate çareserkirina û bi hevkariya şaredariyê cihê sergoyê hate dûrxistin, paşê jî navend hate vekirin.

El-Îbrahîm bi lêv kir ku navendê 143 kesên bi nexweşiya laşmanyayê ketine pêşwazî kir, ji vê hejmarê 52 nexweş hatin dermankirin û hejmara mayî jî niha tedawî dibin.

Elî anî ziman ku kampanya berdewam e ta hemû nexweşên laşmanyayê werin dermankirin.

(bb)

ANHA