Minbiciyan di serdana goristana şehîdan de soza şopandina rêya wan nû kirin

Rêveberî û şêniyên Minbicê ku bi boneya cejna Qurbanê serdana goristana şehîdan kirin, soza şopandina rêya şehîdan nû kirin û tekez kirin ku bi saya şehîdan Minbic hate rizgarkirin û cejna Qurbanê li malbatên şehîdan pîroz kirin.

NÛÇE

21 tebax, 2018 05:21

MINBIC

Îro roja yekê ya cejna Qurbanê ye. Bi vê boneyê şêniyên Minbicê, endamên Rêveberiya Sivîl a Demorkatîk a Minbicê, malbatên şehîdan û Meclisa Leşkerî ya Minbicê serdana goristana şehîdan a bajarê Minbicê kirin. Li goristanê, gul li ser gorên şehîdan hate danîn û fatihe hate xwendin.

Paşê, ji bo giyanê şehîdan gel deqeyeke rêzgirtin sekinî. Piştre, ji rêveberên Saziya Malbatên Şehîdan Xanim Îbrahîm cejna Qurbanê li malbatên şehîdan pîroz kir û got ger ne ji şehîdan ba ew nedgihîştin vê rojê û ewlekarî pêk nedihat.

Ji fermandarên Meclisa Leşkerî ya Minbicê Îbrahîm Hemdan axivî û got:ʺŞehîd rêveberên me yên rast in. Em careke din soz didin em ê li ser rêya şehîdan bimeşin û soza xwe li hemberî wan nû dikin.ʺ

Hevseroka Meclisa Rêveber a Rêveberiya Xweseriya Demokratîk a Minbicê Nezîfe Xelo jî axivî û da zanîn bi saya şehîdan rêveberiya Minbicê hate avakirin û careke din soza şopandina rêya cangoriyan ta pêkanîna armancên wan da.

(kc)

ANHA