Komeleyeke Çerkezan li Minbicê hate vekirin

Welatiyên pêkhateya Çerkez ên bajarê Minbicê komeleyeke xwe ya taybet ji bo xebatên xêrxwazî, çandî û civakî bi navê "Komeleya Çerkezî" vekir.

NÛÇE

15 tebax, 2018 10:17

MINBIC

Xebatên xwebirêxistinkirina pêkhateyên herêma Minbicê bi rêk û pêk berdewam dikin. Welatiyên pêkhateya Çerkez bi armanca pêşxistina xebatên xwe yên xêrxwazî, çandî û civakî, di salvegera duyemîn a rizgarkirina bajarê Minbicê de bi merasîmekê komeleyeke xwe ya taybet bi navê "Komeleya Çerkezî" vekir.

Di merasîma vekirina komeleyê de bi dehan welatiyên bajêr û bi taybet welatiyên ji pêkhateya Çerkez û endamên sazî û komîteyên girêdayî Rêveberiya Sivîl a Demokratîk a Minbicê û şandeya ji Cizîrê beşdar bûn.

Merasîm bi dîlaneke folklorîk a çerkezî li ber stranên folklorîk hate destpêkirin. Piştre xwarinên ku jinên Çerkez amade kirine, hatin pêşkêşkirin.

Armanca komeleyê ew e ku pêkhateya Çerkez komî ser hev bike û çanda çerkezî biparêze û hevgirtinê bi pêkhateyên din re xurt bike. Her wiha dê zimanê çerkezî bi zarokên pêkhateyê bide fêrkirin.

Merasîma vekirina Komeleya Çerkezî bi dîlan û stranên folklorîk ên çerkezî bi dawî bû.

ANHA