Geşedanên dawîn mijara panela li Şehbayê bû

Bi sponseriya Hevbendiya Niştimaniya Demokratîk a Sûriyeyê ya kantona Şehbayê bi hevkariya rewşenbîrên Efrînê, panelek li ser rewşa Bakurê Sûriyeyê hate lidarxistin.

NÛÇE

12 tebax, 2018 16:03

ŞEHBA

Panel li gundê El-Wehşiyê yê girêdayî kantona Şehbayê bi tevlêbûna siyasetmedar, akademsiyan, rojnamevan, rewşenbîr û serokên êlên ereban ên kantonên Şehba û Efrînê hat lidarxistin.

Piştî deqeyek rêzgirtin, komîteya amadekar a panelê bernameya panelê aşkere kir. Di panelê de geşedan û pêşdeçûnên siyasî li ser asta Sûriyeyê û bi taybet Bakurê Sûriyeyê hatin nîqaş kirin. Her wiha rola rewşanbîran di diyarkirina çaranûsa Sûriya pêşerojê de hate bi bîrxistin.

Piştre deriyê nîqaşê ji beşdaran hat vekirin. Mijarên ewlehî û aramiya li Bakurê Sûriyeyê, sedemên dagirkirina Efrînê û xebatên Rêveberiya Xweseriya Demokratîk di nîqaşên panelê de cih girtin.

Beşdaran li ser girîngiya aktîfkirina Komîteya Dîplomasî ya herêmê, gihandina nimûneya projeya demokratîk a Bakurê Sûriyeyê ji hemû cîhanê re tekez kirin. Her wiha beşdaran xwestin ku ji bo li hember dagirkeriya Tirk û siyaseta wê li herêmê pilan bên dayîn.

(şx)

ANHA