Li Iraqê jî komîn tên avakirin

NESRÎN ELÎ-ŞEVÎN HESEN/HESEKÊ

Kampa Holê di 9'ê Adara 2016'an de hate avakirin. Di destpêkê de hejmera koçberan li dora 5 hezar koçber bûn, lê piştî êrîşa DAIŞ'ê li ser Iraqê, gelek şênî koçber bûn û li kampê bi cih bûn. Niha hejmara koçberan li kampê zêdetirî 33 hezar e.

Kampa Holê ji 5 beşan pêk tê, 3 beş ji koçberên Iraqê ne û 2 jî ji koçberên Sûriyeyê ne. Hejmara koçberên Iraqê niha derdora 23 hezaran e.

Piştî rizgarkirina Iraqê ji DAIŞ'ê ji aliyê artêşa Iraqê ve, gelek koçberên Iraqê daxwaznameyên vegera Iraqê pêşkêş kirin. Girêdayî vê mijarê ajansa Hawarê hevpeyvînek bi endama rêveber a Kampa Holê Silava Şêxo re kir.

Silava Şêxo di destpêka axaftina xwe de, behsa çawaniya avakirina kampê û pirsgirêkên rêxistinî kir ku rastî wan hatine û çawa ev pirsgirêk piştî avakirina komînan derbas kirine û wiha got:" Gelek pirsgirêk di aliyê belavkirina konan û pêşkêşkirina alîkariyan de rastî me dihatin, lê piştî ku Rêveberiya Xweseriya Demokratîk kamp bi rêxistin kir û Tevgera Civaka Demokratîk komîn ava kirin û gelek navendên wekî Mala Jinan ji hemû beşan re, me ev pirsgirêk derbas kirin."

Silava diyar kir ku piştî rizgarkirina Iraqê ji çeteyên DAIŞ'ê wan bi hevkariya di navbera Rêveberiya Xweseriya Demokratîk û Hikumeta Iraqê de 32 hezar penaberên Iraq û bi  rêya 10 rêwîtiyan vegerandine Iraqê. Lê ji bo koçberên Sûriyeyê, piştî rizgarkirina herêmên wan û li ser daxwazên wan û piştî koordîneya bi Yekîneyên Parastina Gel û Hêzên Sûriya Demokratîk re wan vedigerînin bajarên wan.

Her wiha Silava diyar kir ku rojane koçberên Iraqê daxwaznameyên vegerê pêşkêş dikin û wiha got: "Em gelek daxwaznameyên koçberan ji bo vegera Iraqê digirin, lê hikumeta Iraqê ji 1'ê Çileyê ve hemû deriyên li ser sînor girtine û ji ber wê koçber nikarin vegerin."

Silava destnîşan kir ku Kampa Holê mezin e. Gelek pirsgirêkên rêxistinî derdiketin holê û ji bo hêsankirina xebatan wan meclis û komîn li kampê ava kirin. Her 24 kon komînek xwe ava kirin û hevserokên xwe hilbijartin û wiha pêde çû:" Piştî avakirina meclis û komînan xebatên rêvebeiya kampê baş bû. Ji ber ku komîn bi riya civînan pakêtên madeyên xwarinê, nan û av li ser koçberan belav dikin".

Silava xuya kir ku koçberên Iraqê dema vegerîn bajarên xwe, tekez kirin ku wan meclis û komîn ji xwe re ava kirin û qanûnên Rojava li welatê xwe pêk tînin.

(şx/ew)

ANHA