Li Yermûkê topbaran didome, koçberên Deraa li ser rêya Idlibê ne

NAVENDA NÛÇEYAN

Navenda Çavdêriya Mafên Mirovan a Sûriyeyê ragihand ku balafirên leşkerî yên Rûsyayê li asîmanê Hewid Yermûk a rojavayê Deraa digerin û bê navber herêmê bombebaran dikin. Êrîşa navborî êvara Sêşemê dest pê kir û hîn jî didome.

Balafirên şer ên Rûsyayê hê jî li herêmê digerin. Hate zanîn ku balafirên Rûsyayê li dijî bajarokên Sehil Cewlan, Tesîl, Eyn Zekir, Hêt û hin bajarokên din ên di bin destê çeteyên de, 80 êrîşên ezmanî pêk anîn.

Di heman demê de li derdora bajarokê Muhît û hin aliyê Yermûk di navbera hêzên rêjîm û çeteyên "Artêşa Xalid bîn El-Welîd" a girêdayî DAIŞ'ê de şer didome. Di heman demê de li herêma Seyda ya Colanê, Til Cimûi û Celîn hîn jî şer bi dijwarî didome.

Li aliyê din jî karwanê welatiyên ji Deraayê ve ber bi Idlibê ve têne koçberkirin, gihaştin deriyê Mork ê di navbera Hema û Idlibê de. Deriyê Mork di navbera hêrêmên rêjîma Sûriyeyê û çeteyên girêdayî Tirkiyeyê yên li Idlibê de ye. Koçerên li deriyê Mork sekinîne ji 24 otobusên ku 900 kes rakirine, pêk tê. Karwanê behsa mijarê duh ji bajarê Besra El-Şam a başûrê Deraayê kete rê û îro gihaştine deriyê Mork.

Hêzên rêjîma Sûriyeyê bi armanca ku xwe bigihîne deriyê sînor ê di navbera Urdin û Îsraîlê de êrîşên xwe pêk anîn, Rûsya jî bi heman armancê gelek itîfaq bi çekdarên opozîsyonê re li dar xistin. Ev jî bû sedema pêşketina lezgîn a hêzên rêjîmê.

Rêjîma Sûriyeyê li bajarokê Cebat El-Xeşeb ê li nêzî herêmên "bêşer" ên Golanê dest bi rêbazeke nû ya danûstandina bi çekdaran re kir. 

(ekîb)