Meclisa Mihemediyê hate vekirin

Meclisa Sivîl a Dêrazorê, li herêma rojavayê Dêrazorê bi merasîmekê Meclisa Gel a gundê Mihêmidiyê vekir. Meclis bi navê Şehîd Xalid Deham El-Beşîre hate vekirin.

NÛÇE

10 tîrmeh, 2018 12:18

DÊRAZOR

Di merasîma vekirina meclisa gundê Mihêmidiyê de, rêveberên Meclisa Sivîl a Dêrazorê, Meclisa Şaredariyan, Hêzên Ewlehiya Hundirîn û xizmên şehîd Xalid Deham El-Beşîre amade bûn.

Merasîm bi deqeyeke rêzgirtinê dest pê kir. Paşê hevserokên Meclisa Şehîd Xalid EL-Beşîre, Nehla El-Hesen û Beşîr El-Hisên vekirina meclisê li mêvanan pîroz kir û soz dan ku dê li gorî berpirsyariya ku gel avête ser milê wan, bin.

Her wiha gelek axaftin hatin kirin, ji wan jî endama Mala Jinan Xedîca El-Casim, endamê Meclisa Malbatên Şehîdan Raxib El-Beşîr û li ser navê meclisên herêmî jî Hisên El-Raşid axivî. Axêveran vekirina meclisê pîroz kir û tekez kir ku meclis ji bo xizmeta welatiyan ava bûye.

Piştî bidawîkirina gotinan, deriyê meclisê ji aliyê birayê şehîd Xalid, Raxib El-Beşîr ve hate vekirin.

Hêjayî bibîrxistin ye ku şehîd Deham Beşîr di pêngava Xezeba Firatê ya ji bo rizgarkirina bajarê Reqayê de, di 28`ê Sibata 2017`an de li Girê Spî şehîd ket û ji gundê Mihêmidiyê ye.

ANHA