Efrînî li Şehbayê jî xwedî li çanda xwe derdikevin

Dewleta tirk di rêya dagirkeriya Efrînê hewl dide çanda gelan tune bike û îradeya şêniyan bişikîne. Lê şêniyên Efrînê yên ku bi ax û çanda xwe ve girêdayî, hemû kiryarên dagirkeran red kirin. Şêniyan dest bi xwebirêxistinê kir. Di vê çarçoveyê de Desteya Çand û Hunerê kar û xebatên xwe li kantona Şehbayê didomîne.

ÇAND Û HUNER

3 tîrmeh, 2018 05:40

ELÎ GEDRO – CAFER CAFO / ŞEHBA

Piştî ku şêniyên Efrînê û saziyên wê ji ber êrîşên artêşa tirk a dagirker û çeteyên wê berê xwe da kantona Şehbayê, şêniyan ji nû ve xwe bi rêxistin kir û saziyên xwe ji nû ve aktîf kirin û dest bi kar û xebatên xwe kirin.

Desteya Çand û Hunerê ji kantona Efrînê veguherî kantona Şehbayê û ev yek ji bo dagirkeran bersiveke tund bû. Bi vê yekê ji çeteyan re hate diyarkirin ku tu carî nikarin çanda gelê herêmê binpê bikin û tu carî nikarin îradeya şêniyên herêmê ku bi axa xwe ve girêdayî ne, bişkîne.

Di vê çarçoveyê de endamên desteya Çand û Hunerê xwe bi rêxistin kir û dewreya perwerdeya dîlanan ji endamên xwe re da destpêkirin.

Dewreya perwerdeyê bi tevlêbûna 57 endamên koma dîlanan a girêdayî desteya Çand û Hunerê dest pê kir. Dewreya perwerdeyê li gundê Ehdas ê girêdayî navçeya Fafînê ya kantona Şehbayê hate destpêkirin. Di hefteyê de wê du rojan perwerde were dayîn.

Di vê çarçoveyê de endama koma dîlanan Mizgîn Çeqalî got ku artêşa tirk a dagirker bi rêya êrîşên li ser Efrînê dixwest ku îrade, nasname û çanda gelê herêmê binpê bike.

Mizgîn di axaftina xwe de ev tişt anî ziman: "Dagirkeran di êrîşên xwe de hemû cureyên çekan bi kar anîn. Lê belê gelê ku îrade û hêza xwe ji şehîd û fikr û felsefeya Rêberê Gelê Kurd Abdullah Ocalan digire tu carî dest ji çanda xwe bernade. Ji ber vê yekê me dest bi kar û xebatên xwe li kantona Şehbayê kir."

Hêjayî bibîrxistinê ye ku koma dîlanan di hemû çalakiyên ku ji aliyê desteya Çand û Hunerê ve li kantona Şehbayê têne lidarxistin de, dîlanan pêşkêş dike.

(bx/ew)

ANHA