Şandeya Kongreya Star gera xwe ya Başûr didomîne

NAVENDA NÛÇEYAN

Şandeyeke Kongreya Star ku serdana başûrê Kurdistanê dike, ger û serdanên xwe ji rêxistin û saziyên jinan re berdewam dike. Şandeyê serdana Navenda Eniya Gel a Demokratîk a li bajarê Silêmaniyê kir û bi hevseroka wê Şêrîn Murad re civiya.

Şandeya Kongreya Star ji endama Komîteya Perwerdeyê Rîhan Qalo, endama Komîteya Dîplomasî li Efrînê Fatme Lekto û endama Komîteya Jinan a Partiya Yekitiya Demokratîk Zehra Aldar pêk dihat.

Di serdanê de şandeyê behsa serkeftinên jinên Rojava û Bakurê Sûriyeyê kir, nemaze avakirina sîstemeke rêveberiyê ya hevbeş û beşdarkirina jinan di hemû aliyên jiyanê de.

Şandeyê her wiha behsa destdirêjiyên artêşa tirk a dagirker der heqê welatiyên Efrînê de kir û bi taybet jinên Efrînê. Her wiha dane zanîn ku dewleta tirk malbatên komên çete yên girêdayî wê li seranserî Efrînê bi cih dike û siyaseta xwe ya guhertina demografîk li Efrînê berdewam dike.

Şandeyê diyar kir ku pêwîst e rêxistinên jinan ên Kurdistanê û cîhanê bi rol û erka xwe li hemberî jinên Efrînê rabin û rê li pêşiya destdirêjiyên Tirkiyeyê bigirin.

Li aliyê din hevseroka Eniya Gel a Demokratîk serbilindiya xwe bi serkeftinên jinên kurd ên Rojava û Bakurê Sûriyeyê anî ziman û diyar kir ku pêwîst e alîkariya projeya jinên Rojava were kirin û pêwîst e jinên Rojava jî tecrubeyên xwe yên têkoşînê bi hemû jinên cîhanê re parve bikin.

ANHA