Komîteya Lihevanînê nakokiyên du malbatan çareser kir

Bi koordîneya şêx û rûspiyên herêmê Komîteya Lihevanînê ya navçeya Til Hemîsê du malbat li hev anîn.

CIVAK Û JIYAN

21 hezîran, 2018 17:56

QAMIŞLO

Bi sedema ku yek ji malbata Eyfan bezê xwe li nav zeviyên malbata Werdan a li gundê Serêc diçêrand di navbera herdu malbata nakokî derket, nakokî gihişt asta kuştina ferdek ji malbata Eyfan.

Komîteya Lihevanînê ya Navçeya Til Hemîsê bi koordîneya şêx û rûspiyên Ereb bi armanca lihevanînê, rûniştinek li gundê Serêc lidar xist.

Endamên herdu malbatê (Werdan û Eyfan) şêxê eşîreya Tey Mihemed Ebdulrezaq, endamên komîteya Lihevanînê ya Navçeya Til Hemîsê û Nûnerê TEV-DEM‘ê Heyal El-Xiweyir di rûniştinê de amade bûn.

Di civînê de, girîngiya lihevkirin û çareserkirina nakokiyan û rawestandina rijandina xwînê, her wiha belavkirina çanda lêborîn û biratiyê hate destnîşankirin.

Berpirsê Komîteya Têkiliyan a TEV-DEM‘ê yê navçeya Til Hemîsê Heyal El-Xiweyir şêx û rûspiyan li ser rola a çareserkirina nakokiyan spas kir û hêviya lihevkirinê ji herdu malbatan xwest.

Di dawiyê de her du malbatê li hev hatin û li pêşiya beşdaran û soz dan ku nakokî dîsa dernekeve.

(bb)

ANHA