'Êrîşên dagirkeran li Efrînê fermaneke nû li dijî Êzdiyan e'

ELÎ GEDRO – CAFER CAFO / ŞEHBA

Di çarçoveya helwestên li dijî hovîtiya artêşa dagirker a Tirkiyê û komên çete yên girêdayî wê yên hilweşandina mezar û deverên pîroz ên Êzdiyan li Efrînê de, welatiyên Êzdî yên ku neçarî koçberiyê hatine kirin ji ajansa me (ANHA) re axivîn.

Welatiyê bi navê Gîvara Hesen ê ji gundê Endarê ya girêdayî bajarê Efrînê diyar kir ku hovîtiya artêşa dagirker a Tirkiyeyê û komên çete yên girêdayî wê berdewama kiriyarên çeteyên DAIŞ'ê li Şengalê ye û wiha got: "Dagirkeran mezar û deverên pîroz ên Êzdiyan li Efrînê hilweşandin. Evan kiryar di çarçoveya tunekirina hebûna Êzdiyan de tên pêkanîn û ev fermana 74'an li dijî pêkhateya Êzdî ye."

Welatiyê bi navê Ebû Xelo yê ji gundê Keferzîtê ya girêdayî devera Cindirêsê di derbarê heman mijarê de wiha anî ziman: "Tevî hemû talan, kuştin û revandinê, dagirker hewl didin hebûna Êzdiyan di Efrînê de tune bikin û hemû mezar û deverên pîroz hildiweşînin."

Welatiya bi navê Qudret Betal kiryarên artêşa dagirker a Tirkiyeyê di derheqê pêkhateya Êzdî de şermezar kir û bêdengiya civaka navnetewî li hemberî van kiryaran jî bi tundî şermezar kir û bang li hemû rêxistinên hiqûqî yên navnetewî kir ku destwerdana xwe bikin û bi berpirsyariyên xwe yên mirovahî rabin û rê li pêşiya hovîtiya artêşa Tirkiyeyê bigirin.

Artêşa Tirkiyeyê ji dema ku herêma Efrînê dagir kiriye ve gelek welatiyên Êzdî revandine û hêjî çarenûsa wan ne diyar e. her wiha gelek mezarên taybet bi pêkhateya Êzdî hilweşandin.

ANHA