Şaredariya Minbicê di geşkirina bajêr de kedeke mezin dide

NEJBÎR OSMAN – AZAD SEFO / MINBIC

Piştî ku Meclîsa Leşkerî ya Minbicê bajar rizgar kir, piştî çend salan ji zulm û tarîtiyê, ronahiya azadiyê bi ser bajêr ve hat. Binesaziya bajêr ji nû ve hatesererastkirin û saziyên karûbarên xizmetguzarî û sivîl ên weke Şaredariya Gel hatin damezrandin.

Şaredariya Gel a bajarê Minbicê ji dema hatiye damezrandin ve gelek porjeyên xizmetguzarî pêk anîn. Şaredariyê bi hemû hêz û derfetên xwe xebatên xwe ji bo pêşxistin û geşkirina bajêr dane meşandin.

Yek ji xebatên ku Şaredariya Gel pêk aniye, sererastkirina pireyan bû.

Buroya Pîşeyî ya girêdayî Komîteya Şaredariyan a bajarê Minbicê binsaziya bajêr sererast kir.

Şaredariyê pira Safî ya di navbera bajarê Minbicê û gundên derdora wê de sererast kir. Şaredariyê her wiha du pireyên El-Qadir û El-Xezanat ên li gundê Cub El-Qadir ava kirin.

Di hundirê bajarê Minbicê de Şaredariyê gelek xebat dane meşandin û 3 çerxerê sererast kirin û li ser riya Cerblûs û Cezîrê çerxeriyeke nû ava kir. Her wiha parkên di bajêr de jî sererast kirin û toreyên av û kehrebeyê di van parkan de çêkirin.

Şaredariyê projeya sererastkirina kanalîzasyona bajêr bi baldarî da meşandin. Şaredariyê gelek rê û kolanên bajêr jî sererast û qîr kirin.

Bi armanca parastina welatiyan ji nexweşiyan, Şaredariyê gelek caran derman di nava bajêr de reşand.

Girêdayî mijarê Hevserokê Şaredariya Gel a bajarê Minbicê Telal Îsa ji ajansa me ANHA'yê re axivî û got ku Şaredariya Gel bi hemû hêz û derfetên xwe ji bo xizmeta welatiyan tevdigere û bi dê asta xebatên xwe ji bo xemlandina bajêr zêde bike.

Îsa bang li hemû welatiyan kir ku bi Şaredariya Gel re bibin alîkar û beşdarî xebatên pêxistin û geşkirina bajarê xwe di hemû aliyan de bibin.

ANHA