'Her qadeke Kurdistanê qadeke berxwedanê ye'

KOBANÊ

Bi hezaran welatiyên deverên cûda yên herêma Firatê li qada Jina Azad a taxa Botan a bajarê Kobanê kom bûn û dest bi xwepêşandanekê li dijî dagirkeriya Tirkiyeyê li Kurdistan, kirin.

Ev xwepêşandan piştî ku komeke ji akademîsyen, ronakbîr, siyasetmedar, partî, komele û saziyên civaka sivîl ên Kurdistanî û cîhanî lîsteyek îmze kirin û têde bang li hemû hikûmet û rêxistinên navnetewî (Netewên Yekbûyî, NATO, Yekîtiya Ewropa û Yekîtiya Dewletên Ereb) û gelên demokrasîxwazên ên cîhanê kirin ku li dijî dagirkeriya Tirkiyeyê derbikev û alîkariya têkoşîna ji bo azadiya Kurdistanê bikin.

Welatiyan di xwepêşandana xwe de wêneyên Rêberê Gelê Kurd Abdullah Ocalan û pankartên bi nivîsên ku bêdengiya navnetewî li hemberî destdirêjiyên Tirkiyeyê û bi taybet destdirêjiyên wê yên li dijî welatiyên Efrînê şermezar dikin bilind kirin. Xwepêşandan ji qada Jina Azad dest pê kir û ber bi qada Şehîd Egîd ve herikî.

Endama Meclîsa Partiya Yekîtiya Demokratîk Dîlber Yûsif ku beşdarî xwepêşandanê bibû wiha got: "Ev rojekek dîrokî ye û dê bibe destpêka qonaxeke nû û emê têkoşîna xwe li dijî hikûmeta Tirk a faşizmê li ser axa xwe bilind bikin. Hemû qadên Kurdistanê qadên berxwedanê ne."

Dîlber got ku divê her kes nas bike ku rizgarkirina Efrînê armanca sereke ye û wiha domand: "Kesên azad ti carî dagirkeriya Tirkiyeyê qebûl nakin. Divê herêma Efrînê û hemû herêmên Kurdistanê bêne rizgarkirin."

Bi heman armancê li gelek bajarên cîhanê li dijî dagirkeriya Tirkiyeyê li herêmên Kurdistanê xwepêşandan tên lidarxistin.

ANHA