Xebatên Komîteya Tenduristiyê ya Reqayê

FIDA ELÎ – CÎHAN MIHEMED / REQA

Di meha Tîrmeha sala borî de Komîteya Tenduristiyê ya Meclîsa Sivîl a Reqayê bi hevkariya rêxistinên tenduristî yên navnetewî hemleya derzîlêdanê li dijî felca zarokan li gundewarê Reqayê pêk anîn û di hemleyê de 105 hezar zarok ji giştî 120 hezar zarokan derzî kirin. Her wiha hemleyeke zaniyariya tenduristî pêk anîn.

Hemleya duyemîn a li dijî felca zarokan di cotmeha sala borî de pêk hat û di vê hemleyê de jî 130 hezar zarok ji giştî 145 hezar zarokan hatin derzîkirin. Her wiha hemleyeke din a li dijî felca zarokan di çileya îsal de pêk anîn û li rex wê hemleya zaniyariya tenduristî hate meşandin.

Di adara îsal de Komîteyê hemleyeke din a li dijî felca zarokan da meşandin û têde 175600 zarok ji giştî 180 hezar zarokan hatin derzîkirin.

Avakirina komîteyan û destûrkirina dermanxane û navendên tenduristiyê

Komîteyê li rex xebatên xwe yên hemleyên derzîlêdanê gelek komîteyên tenduristî yên cûda ava kirin da ku rewşa dermanxaneyan li giştî gundewarê Reqayê bişopînin û rê li pêşiya derqanûniyan bigirin her wiha destûra kar ji 150 dermanxaneyan re û 8 embarên dermanan re peyda kirin û 36 dermanxaneyên ku bi awayekî derqanûnî dixebitîn girtin û laboratwarek destûr kirin.

Komîteyê her wiha destûrên navendên tenduristiyê yên gundên El-Kisra, devera El-Hos, El-Meşhedanî, navenda Dar El-Şîfa, nexweşxaneya El-Ferat a bajarê Reqayê destûr kirin.

Her wiha navendên tenduristî li kampa Eyn Îsa, devera Hemra, Nasra û El-Kesrat bi hevkariya komeleya El-Mewedê ya xêrxwaz vekirin.

Komîteyê her wiha navenda tenduristî ya li taxa El-Meşleb a bajarê Reqayê û navenda tenduristî ya li El-Xatûniyê aktîf kirin û derman û pêdiviyên tenduristiyê ji wan re peyda kirin.

Komîteya Tenduristiyê her wiha navenda tenduristiyê ya taxa Sêf El-Dewlê ji nû ve aktîf kir û bankeke xwînê têde ava kirin û kadroyekî tenduristiyê jêre peyda kir. Her wiha navenda tenduristiyê ya El-Reşîd bi hevkariya rêxistina Heyva Sor a Kurd û rêxistina UPP ya Îtaliyayê sererast kir û niha peymangeheke tenduristiyê li Reqayê vedike.

Komîteya Tenduristiyê serdana nexweşxaneya El-Wetenî kir piştî ku ji mayînê û bermahiyên hilweşandî hate paqijkirin û alavên ku ziyan nedîtine careke din bikaranîn û niha lêkolîneke berfireh di derbarê rewşa tenduristî ya herêmê û derfetên jinûve xebitandina nexweşxaneya El-Wetenî de amade dike.

Serokê Komîteya Tenduristiyê ya Meclîsa Sivîl a Reqayê Ehmed Xelîl di derbarê mijarê de diyar kir ku dê bi hemû hêz û derfetên xwe hewl bidin alîkariya tenduristî pêşkêşî welatiyan bikin.

(jh)

ANHA