Gel bi înîsyatîfa xwe seyrangeha Dehlî amade dike

LÎNA CANGÎZ – KELSÛMA ELÎ / QAMIŞLO

Li navçeya Girkê Legê gelek deverên geştewar hene û li van deveran welatiyên herêmê di demsalên buhar û havînê de berê xwe didin vir. Yek ji van geştewaran devera Dehlî ye û têde gelek kanî û darên cûda hene. Dehlî li başûrê gundê Qerxo ya bakurê Girkê Legê dikeve.

Bi armanca parastina vê devera geştewar hejmareke ciwanên gundên Qerxo û Şêx Îbrahîm hemleyeke avakirina dîwarekî û paqijkirina kaniyan û avakirina golên avjaniyê yên ji bo zarokan dest pê kirin.

Armanc zêdekirina deverên geştewar û parastina wan e

Înîsyatîfa ciwanan rastî piştgirî û alîkariyeke mezin ji aliyê welatiyan ve hat û hejmareke welatiyan miqdareke pereyan weke alîkarî pêşkêşî projeyê kirin.

Yek ji ciwanên beşdarî hemleyê yê bi navê Mihemed Şefa Mehmûd ê ji gundê Qerxo got ku armanc ji înîsyatîfa wan ew e ku hejmara deverên geştewar li navçeyê bêne zêdekirin û parastin. Bi taybet piştî ku dewleta Tirk geşta welatiyan a gundê Eyn Dîwar a devera Dêrikê ya nêzî sînor qedexe kir.

Ciwanê bi navê Dildar Ehmed ê ji gundê Şêx Îbahîm got ku hejmara daran li vê geştewariyê kêm dibin, nemaza ji ber ku ava kaniyan jî kêm dibe û ji ber vê yekê wan hemleyek daye dest pêkirin da ku daran li vê deverê biçînin û av bidin û got ku heta niha 250 darên cûda di qonaxa yekemîn a projeyê de hatine çandin û dê derdora vê deverê sînor bikin. Her wiha di hemleyê de dê kaniyan paqij bikin û golên avê ji bo avjeniya zarokan ava bikin.

Şaredariyê alîkarî pêşkêş kir

Buroya Hawîrdorê ya Şaredariya Gel a navçeya Girkê Legê înîsyatîfa ciwanan buha nirxand û alîkariya xwe pêşkêş kir.

Endamên rêveberiya Buroyê endeziyar Mahir Silêman di derbarê mijarê de got ku Şaredariya Gel alîkariya projeyê dike û heta niha 250 dar bi hevkariya ciwanên dildar ên gundên derdorê çandine.

Silêman diyar kir ku di qonaxa duyemîn de dê riya ber bi devera geştewar ve sererast bikin.

ANHA