Pêşengeha Rojava diyarî Berxwedana Serdemê kir

Hevseroka Desteya Çand û Hunerê ya Kantona Cizîrê Bêrîvan Xalid diyar kir ku ew Pêşengeha Rojava ya Şêwekariyê diyarî Berxwedana Serdemê dikin û got, "Em ê her sal roja 18‘ê Gulanê bikin rojeke dîrokî ji bo hurera şêwekariyê ya li Rojava."

ÇAND Û HUNER

19 gulan, 2018 15:05

QAMIŞLO

Sêyemîn Pêşengeha Rojava ya Hunera Şêwekariyê duh di bin dirûşemeya "Hunera gelan dengê berxwedana Efrînê ye" ji aliyê Desteya Çand û Hunerê ya Kantona Cizîrê ve hate vekirin.

Hevseroka Desteya Çand û Hunerê ya Kantona Cizîrê Bêrîvan Xalid armancên vekirina pêşengekê ji ajansa me re nirxand.

Bêrivan Xalid di destpêka axaftina xwe de anî ziman ku ji bo bîranîna şehîdên meha Gulanê û bîranîna şehîdê rewşenbîr Heqî Qerar pêşengeh her sal li ser asta Rojava û Bakurê Sûriyeyê tê vekirin. Li gel vê yekê jî li her du salan li ser asta Kurdistanê platform tê lidarxistin.

Bêrîvan Xalid destnîşan kir ku ji ber şert û mercên li Efrînê rû didin şêwekarên Efrînê nedikarîbûn beşdarî pêşengehê bibin û wiha domand, "Em pêşengehê diyarî Berxwedana Serdemê dikin. Herî kêm ev erka me ya li hemberî berxwedana leheng e."

Hevseroka Desteya Çand û Hunerê ya Kantona Cizîrê Bêrîvan Xalid destnîşna kir ku sibe yekşemê ango roja dawî ya pêşengehê dê civîneke çapemeniyê derbarê pêşengehê de were lidarxistin û xelat werin belavkirin û wiha got, "Em ê her sal roja 18‘ê Gulanê bikin rojeke dîrokî ji bo hunera şêwekariyê ya Rojava."

(bb)

ANHA