Li Reqayê cenaze ji gorên komî têne derxistin

XALID CUMA-DIYAR EHMO/REQA

Ekîba Taybet a girêdayî Komîteya Jinûve Avakirina Reqa  ji 9'ê çileya 2018'an û heta niha zêdeyî 750 cenaze ji gorên komî derxistine.

Çeteyên DAIŞ  dema herêm dagirkiribûn, gelek herêmên wekî Stadyoma El-Reşîd a li navî bajarê Reqa, Par û erdên bajar ên vala wekî cihê goristanên komî bikar tanîn.

Dema hêzên QSD'ê bajarê Reqa rizgarkirin, çeteyên DAIŞ'ê welatiyên sivîl wekî mertalên zindî ragirtin û kesên hewl didan ji wan birevin herêmên QSD'ê, ew digirtin û wan qetil dikirin. Piştî welatî dihatin qetilkirin, cenazeyên wan davêtin kortên mezin û ax davêtin ser wan.

Endamê Rêveber ê Ekîba Taybet Yasir El-Xemîs derbarê mijarê de got ku ekîba wan xwe wekî 4 beşan parve kirine û ev tişt anî ziman: "Koma derxistina cenazeyan ji gorên komî, ekîba agirkujiyê, destwerdana û koma binê avê pêk tê. Welatî agahiyan didin me û cihê gorên komî diyar dikin. Em jî diçin wê herêmê û cenazeyan ji gorên komî derdixin."

El-Xemîs, her wiha da zanîn ku piştî cenazeyan derdixin di riya bijîşkên şerî wan tesbît dikin, an jî di riya begeyên li ser wan û wiha dom kir: "Dema cenaze tê naskirin, em cenaze didin malbatên wan. An jî em li goristana bajarê Reqayê ya li gundê Til El-Beya defin dikin. Ji ber alavên me yên pêşketî nînin, em di naskirina nasnameya welatiyan de zehmetiyan dikşîn in."

El-Xemîs, da diyarkirin ku Stadyoma El-Reşîd a li nava bajarê Reqayê ji aliyê çeteyên DAIŞ'ê ve wekî navenda gorên komî dihate bikaranîn û destnîşan kir ku ji vir heta niha zêdeyî 500 cenaze derxistine.

Yasir El-Xemîs her wiha destnîşan kir ku gelek caran ekîba wan di gorekê de 4-5 kesên ku li ser hev hatine avêtin û ax li ser wane dibînin û ev tişt anî ziman: "Cenaze bi laylonê hatine pêçan. Ji ber mayinên çeteyan metisîn li ser jiyana endamên ekîba me heye."

Meclîsa Sivîl a Reqayê xebatên Ekîba taybet di 9'ê çileya îsal de aktîf kir.

(dc)

ANHA