Gelê Efrînê tevî hemû zehmetiyan berxwedanê didomînin

Şêniyên Efrînê li kampa Serdemê tevî derfetên kêm û zehmetiyên jiyanê, berxwedana xwe didomînin. Lê rêxistinên mirovî tu alîkariyê pêşkêşî gel nakin.

NÛÇE

7 gulan, 2018 06:28

ŞEHBA

Ji ber ku hejmara welatiyên Efrînê li kampa Berxwedan a Kantona Şehbayê zêde bû, Rêveberiya Xweseriya Demokratîk a Kantona Efrînê bi hevkariya rêveberiya Şehbayê re, 7′ê Nîsanê kampa Serdemê li navçeya Ehrezê vekir.

Li kampê 250 kon hatin vedan û dê hezar û 300 kes bi cih bûne. Şaredariya Gel hewl dide kampê fireh bike. Gel li kampê bi riya komanê xwe birêxistin dikin û bi ruhekî hevbeş tev digerin.

Rêveberiya kampê bi derfetên heyî xizmeta gel dike, avê û nan pêşkêşî gel dike. Her wiha ceyran û televizyon ji gel peyda kir, da rewşa herêmê û pêşveçûnên dawî bişopînin.

Heyva Sor a Kurd jî noqteyeke xwe li kampê ava kir û xizmeta tenduristiyê pêşkêşî gel dike.

Nûçegihanên me rewşa gel li kampê şopand. Gel banga alîkariyê li rêxistinên mirovî kirin.

Endama Rêveberiya kampê û Hevseroka Meclîsa Zagonsaz a Kantona Efrînê Hêvîn Reşîd diyar kir ku gelek rêxistinên mirovî soza alîkariyê didin lê pêk nayînin û diyar kir ku bi nêzîkbûna havînê re, pêwîstî bi gelek madeyên jiyanî heye.

RAPOR: ŞERVÎN MUSTEFA

KAMERA: TOLÎN HESEN

ANHA