Li Ewropa greva birçîbûnê ji bo azadiya Ocalan didome

Ji bo Rêberê Gelê Kurd Abdullah Ocalan li gelek welatên Ewropayê greva birçîbûnê tê kirin. Li Qibrisê greva birçîbûnê destpê kir û li Marsîlya û Bremenê jî greva birçîbûnê roja 2’an li paş xwe hişt.

24 nîsan, 2018 19:19

NAVENDA NÛÇEYAN

Li pêşiya şaredariya Lîmasol a Qibrisê, çalakiya greva birçîbûnê a çar rojan dom bike destpê kir. Kurdên li pêşiya şaredariyê kon vedayî, daxwaz dikin ku tecrîda li ser Ocalan bi dawî were û azad bibe. Çalakvanan bi taybet bêdengmayîna Komîteya Pêşîlêgirtina Êşkenceyê ya Konseya Ewropa CPT protesto kirin, û bang kir ku xwedî li berpirsyartiya xwe derkeve. Ev greva birçîbûnê wê 27’ê Nîsanê bi meşekê bi dawî bê.

Bi heman armancê li bajarê Marsîlya a Fransa greva birçîbûnê di roja 2’emîn de jî berdewam kir. Greva birçîbûnê roja Dûşemê bi daxuyaniyek a çapemeniyê hatibû lidarxistin.

Greva birçîbûnê ya Başûrê Fransa ji di nav de, bi tevlîbûna 42 kesên ji Toulouse, Lyon, Marîgnane, Montpellîer, Draguîgnan û Marsîlyayê hatibû destpêkirin. Çalakî wê roja Çarşemê di saet 19:00’an de bi dawî bibe.

Greva birçîbûnê ya li bajarê Bremen a Elmanya jî bi piştgiriya serdanan berdewam kir. 15 kesên roja yekem di kon de derbaz kirin. greva birçîbûnê wê roja Çarşemê bi mîtîngek girseyî bi dawî bikin.