‘Bi êrîşên dagirkeriya Tirk li ser Efrînê şaneyên DAIŞ`ê li herêmê aktîf bûne’

UDEYÎ EHMED-MIHEMD EL-HEYAWÎ / TEBQA

Di 20`ê çil de, bi erêkirina Rûsya, dewleta Tirk a dagirker û çeteyên wê êrîşî Efrînê kirin, di demeke ku QSD`ê li herêma sînorê Sûriyê-Iraqê şerê DAŞ`ê dikir.

Tevî rizgarkirin û serweriya ewlekariyê li herêmê, car caran şaneyên veşartê yên DAIŞ`ê bi êrîşên li ser Efrînê, li herêmê derdikevin.

Têkildarî mijarê, ji rêveberên Dîwana Giştî ya Hêzên Ewlekariya Hundirîn a Herêma Tebqayê Mihemed Polat ji ajansa me re axivî û ev tişt anî ziman,ʺPiştî rizgarkirina herêma Tebqayê, şaneyên veşartî yên DAIŞ`ê  ji bo derbkirin û xerabkirina ewlekariya herêmê, bi karên qirêj radibe. Ev şane yekser girêdayî dewleta Tirk a dagirker e û îsbata vê yekê jî dema dagirkeriya Tirk êrîşî Efrînê kir, şaneyên DAIŞ`ê ketin nava tevgerê.ʺ

Hêzên Sûriyê Demokratîk(QSD) gelek caran hişyarî da ku bi êrîşên dagirkeriya Tirk li ser Efrînê, wê DAIŞ`ê jinûve zindî bibe. DYA`yê jî gelek caran têkildarî heman mijarê hişyarî da, lê tiştek li ser rûyê erdê nekir.

Polat di berdewamiya axaftina xwe de destnîşan kir ku Hêzên Ewlekariya Hundirîn gelek şaneyên DAIŞ`ê girtin, piştî lêpirsînê têkiliya wan bi dagirkeriya Tirk derket holê.

Beriya niha bi du hefteyan Hêzên Ewlekariya Hundirîn a Tebqayê şaneyeke veşartî ya DAIŞ`ê li bajarê Tebqayê girtin.

Polat di berdewamiya axaftinên xwe de tekez kir ku ew wekî Hêzên Ewelarkiya Hundirîn ji bo xurtkirina ewlekariyê li herêmê û xurtkirina bendên kontrolê, ew ê xebatên xwe zêdetir bikin.

Polat di dawiya axaftinên xwe de soza tunekirina hemû şaneyên ʺterorîstʺ li herêmê da.

(kc)

ANHA