3′yemîn mihrîcana huner û wêjeya jinê pêşkêşî jinên Efrînê hat kirin
![3′yemîn mihrîcana huner û wêjeya jinê pêşkêşî jinên Efrînê hat kirin](https://hawarnews.com/kr/uploads/images/201803/142852_qamislo-festival-7-620x364.jpg)
QAMIŞLO – 3′yemîn mihrîcana huner û wêjeya jinê ya Rojava-Bakurê Sûriyê li Navenda Çand û Hunerê ya Mihemed Şêxo ya bajarê Qamişlo dest pê kir.
Di mihrîcanê de bi dehan şêniyên herêmên Cizîrê, Firatê û bajarê Minbicê, her wiha Hevserokatiya Desteya Çand û Hunerê ya herêma Cizîrê Bêrîvan Xalid û Ilyan Seydo amade bûn.
Di mihrîcanê de pêşengeheke hunera şêwekarî, wênexêzî û tiştên bi destê jinê têne çêkirin hatin pêşkêşkirin.
Mihrîcan bi deqeyek rêz dest pê kir. Piştre bi navê Weqfa Jina Azad Ahîn Mihemed, bixêrhatina beşdaran kir û mihrîcan diyarî jinên Efrînê yên berxwedêr kir.
Bi navê jina rewşenbîr a Minbicê jî Xezala Yûsif axivî. Xezala jinên Cizîrê silav kirin û got ku di vê mihrîcanê de hevgirtina jinên ji tevahî gelên Rojava diyar dibe. Xezala wiha domand, ″Me ev mihrîcan li dar xist, da em bal bikişînin ser rola pêşeng a jinê di qadên civakî, leşkerî, aborî, siyasî û hunerî de.″
Piştî axaftinan, koma jina ciwan ″Kevana Zêrîn″ stranên folklorî gotin. Piştre jî dîlan hatin kirin û helbest hatin xwendin.
Komîteya amadekar xebatên mihrîcanê nirxandin û kesên bi ser ketin, diyarî li wan belav kirin.
(mm)
ANHA